Рональд Куманнинг дарвозабон ўғли иккита гол урди

Нидерландия чемпионати бешинчи турида футбол тарихига кириши мумкин бўлган ноодатий воқеа қайд этилди. Унинг марказида эса «Барселона» ва Нидерландия терма жамоаси афсонавий ҳимоячиси Рональд Куманнинг ўғли — кичик Рональд Куман бўлди. Ҳозирда у «Телстар» жамоаси дарвозабони сифатида фаолият юритмоқда. 

«Телстар» ушбу турда «Камбюр»га қарши майдонга тушди ва учрашув жамоа учун омадсиз бошланди: иккинчи бўлимнинг бошидаёқ улар ўз дарвозаларидан икки гол ўтказиб юборишди.

Шу пайтдан сўнг вазиятни «Телстар» дарвозабони кичик Рональд Куман ўз қўлига олди. Аввал у пенальтини аниқ амалга ошириб, ҳисобдаги фарқни қисқартирди. Ўйинга қўшиб берилган дақиқаларда эса жамоа яна бир пенальти ишлаб олди ва уни ҳам Куман ижро этди — яна гол!

Натижада Рональд Куман кичик Нидерландия олий дивизиони тарихида бир ўйинда икки ва ундан ортиқ гол урган илк дарвозабон сифатида қайд этилди.