Роналду Португалия терма жамоасини тарк этгани учун дисквалификация қилиниши мумкин

Португалия терма жамоаси етакчиси, беш карра "Олтин тўп" соҳиби Криштиану Роналду миллий жамоа қароргоҳини тарк этгани учун жарима ва майдондан четлатилиши мумкин. 

Нашр маълумотича, Португалия футбол федерациясининг интизом қоидаларига кўра, терма жамоа лагерини ўзбошимчалик билан тарк этган футболчи миллий жамоа ўйинларидан бир ойдан олти ойгача четлатилиши мумкин. Шунингдек, унга 500 дан 1000 евро гача миқдорда жарима қўлланиши назарда тутилган.

Аввалроқ ТАСС хабарида қайд этилишича, Роналду Миллатлар лигаси гуруҳ босқичи учинчи турида Данияга қарши ўйин олдидан Португалия терма жамоаси қароргоҳини тарк этган. Ушбу учрашув 1 октябрь куни бўлиб ўтади. Ҳужумчи бу қарор сабабларини келажакда оммага маълум қилишини айтган. Роналду турнирнинг ўтган турида Норвегияга қарши баҳсда (2:1) ҳам майдонга тушмаган эди.

Роналду ҳозирда 41 ёшда. У беш марта Чемпионлар лигаси ғолиби, Европа чемпиони ва икки карра Миллатлар лигаси ғолиби ҳисобланади. У миллий терма жамоалар, Европа чемпионатлари, Чемпионлар лигаси ва клублар ўртасидаги жаҳон чемпионатлари тарихида энг кўп гол урган футболчи сифатида бир қатор рекордларга эга. Футболчи 2022 йил декабридан бери Саудия Арабистонининг "Ал-Наср" клуби шарафини ҳимоя қилмоқда. У ўз фаолияти давомида португалиялик "Спортинг", англиялик "Манчестер Юнайтед", испаниялик "Реал" ва италиялик "Ювентус" таркибларида ҳам ўйнаган. Роналду профессионал карьерасида жами 979 та гол урган, шундан 146 таси Португалия терма жамоаси, 833 таси эса клублар ҳиссасига тўғри келади.