Роналдо Анчелоттига маслаҳат берди: Луис Энрике асосий таркибда ўйнаши керак

Бразилия терма жамоасининг собиқ ҳужумчиси Роналдо Жаҳон чемпионатида Марокашга қарши баҳсдан кейин бош мураббий Карло Анчелотти таркибга ўзгартиш киритиши мумкинлиги ҳақида фикр билдирди.

Афсонавий футболчи фикрича, кейинги ўйинда "Зенит" ҳужумчиси Луис Энрике илк дақиқалардан майдонга тушиши лозим.

"Анчелотти ўзгариш қиладими ёки йўқми, билмайман. Мен бўлганимда бир нарсани ўзгартирган бўлардим. Луис Энрике ўйинга жуда яхши қўшилди ва ўнг қанотни кенгайтириб ўйнади.

Пакета ҳам, Рафинья ҳам бу вазифани тўлиқ бажара олмади. Улар ўйинни Винисиус чап қанотда қилгани каби кенгайтира олмади. Бу эса марказдаги футболчилар учун кўпроқ бўш ҳудуд яратади.

Бразилия кўпроқ эркин ҳудудга эга бўлса, бу ҳар доим жамоа фойдасига ишлайди. Менимча, айнан шу кичик ўзгариш амалга оширилиши мумкин.
Қолган жиҳатларда эса таркиб ўзгармайди деб ўйлайман. Анчелотти старт таркибидаги футболчиларга ишонч билдириб, биринчи ўйиндаги босимни енгиб ўтишларига ёрдам беради", — деди Роналдо.

Эслатиб ўтамиз, Бразилия терма жамоаси Жаҳон чемпионати гуруҳ босқичининг иккинчи турида 20 июнь куни Гаитига қарши майдонга тушади.