Роналду Ўзбекистонга қарши ўйинга тайёргарликни бошлади

Саудия Арабистонининг “Ан-Наср” клуби ҳужумчиси Криштиану Роналду ижтимоий тармоқларда Португалия миллий терма жамоа йиғинига етиб келганини маълум қилди.

Шу тариқа, жаҳон футболида энг кўп тўп киритган футболчи 2026 йилги жаҳон чемпионатига тайёргарликни бошлади.

Роналду ўзининг ижтимоий тармоқ саҳифаларига сурат жойлаб, унга “Мундиал миссияси бошланди!” деб изоҳни қолдирди.

41 ёшли ҳужумчи Португалия миллий терма жамоасининг 2026 йилги жаҳон чемпионати учун якуний таркибига киритилган.

Бу унинг фаолиятидаги олтинчи мундиал бўлади. Роналду жаҳон футболида миллий терма жамоалар тарихида энг кўп ўйин ўтказган ва энг кўп гол урган футболчи ҳисобланади. У Португалия терма жамоаси сафида 226 та ўйинда 143 та тўп киритган.

Португалиянинг жаҳон чемпионатида гуруҳ босқичидаги рақиблари Конго Демократик Респбуликаси, Ўзбекистон ва Колумбия миллий терма жамоалари бўлади.