Роналду: Шу иш юз бермагунича Саудиядан кетмайман!

“Ан-Наср”нинг португалиялик ҳужумчиси Криштиану Роналдунинг клуб билан шартномаси ярим йилдан кейин якунланади.

Marca нашрининг ёзишича, Роналду Саудия Арабистонидан кетишга шошилмаяпти. 39 ёшли тўпурар бу мамлакат чемпионлигига эришмагунича, шу ерда тўп тепишга қарор қилди.

Криштиану легионерга айланганидан бери ўзи ўйнаган лигаларида чемпионлик нашидасини сурган. Моҳир тўпурар “Манчестер Юнайтед”да Англия, “Реал”да Испания ва “Ювентус”да Италия чемпиони бўлди.

Криштиану Роналду “Манчестер Юнайтед” раҳбарияти билан чиқиша олмай қолганидан кейин Европани тарк этганди. У 2023 йилдан бери “Ан-наср” шарафини ҳимоя қилиб келмоқда.