Роналдунинг шеригини Англия, Испания ва Италия грандлари чақиряпти

Каталониянинг машҳур «Барселона»си ва «Милан» клуби собиқ ҳужумчиси Жоау Фелиш яна Европа майдонларига қайтиши мумкин. Бу ҳақда ижтимоий тармоқларда инсайдер Экрем Конур хабар тарқатди.

Ҳозирда португалиялик футболчи Саудия Арабистони чемпионатида «Ан-Наср» жамоаси шарафини ҳимоя қилмоқда. Томонлар ўртасидаги шартнома келаси йил ёзида ўз ниҳоясига етади. Агар битим узайтирилмаса, Фелиш эркин агент мақомига эга бўлади ва исталган клуб билан эркин шартнома имзолаш ҳуқуқини қўлга киритади.

Манбаларга кўра, Жоау Фелиш учун энг реал йўналиш сифатида Туриннинг «Ювентус» клуби тилга олинмоқда. Шу билан бирга, унга «Манчестер Юнайтед» ва собиқ жамоаси «Барселона» ҳам қизиқиш билдирмоқда.

Фелиш жорий мавсумда Саудия Арабистони чемпионатида олти ўйинда майдонга тушиб, икки гол урди ва яна икки голли узатма муаллифи бўлди.