"Рости, кетиш ниятим бор эди..." - "Бухоро" сардори хориждан тушган таклифларни қабул қилмади. Чунки...

Биринчи даврани зўр ўтказа олмаган “Бухоро”нинг бор умиди энди иккинчи даврадан. Бунгача керагидан ортиқ очколарни йўқотган клуб мавсумнинг иккинчи ярмида вазиятни ўнгламаса бўлмайди. Акс ҳолда уларни яна про лига кутиб олади. Шу боис бухороликлар Суперлигада қолиш учун жиддий ва охиригача курашишлари аниқ.

Хабарингиз бўлса керак, “Бухоро” айни пайтда Тожикистонда ўқув-машғулот йиғинини олиб бормоқда. Клуб етакчиларидан бири Дилшод Жўраев ўша ерда бўлиб турган Sports.uz журналистининг бир қатор саволларига жавоб қайтарди.

- “Бухоро” билан ёзги йиғин тайёргарлигини Тожикистонда ўтказяпсиз. Хўш, бу ердаги машғулотлар қандай давом этяпти?

- Ҳа, тайёргарлигимизни Тожикистонда олиб боряпмиз, ҳар куни икки маҳалдан шуғулланяпмиз. Асосий эътибор жисмоний юкламаларга қаратиляпти. Кейин ўйинларда тактик услубларга ҳам эътибор қаратамиз. Йиғинимиз кўнгилдагидек кечяпти. Худога шукр, шароитлар ҳам яхши.

- “Бухоро” биринчи даврада ўз имконияти даражасида иштирок эта олгани йўқ. Мавсумнинг дастлабки қисмидаги омадсизликдан жамоа қандай хулоса чиқарди?

- Биринчи даврада ўйин томонлама ёмон бўлди, деб ўйламайман. Бошида бизда жароҳатлар кўпайиб кетди. Вазиятлардан фойдаланиш масаласида оқсадик. Биринчи даврадаги камчиликлардан хулоса чиқариб, иккинчи даврага тайёргарлик олиб боряпмиз.

- Тожикистон йиғини давомида маҳаллий клубларга қарши ўртоқлик учрашувларида иштирок этяпсизлар. Рақиблар савияси қандай ва учрашувлар сизда қандай таассурот қолдиряпти?

- Беркитишни ҳожати йўқ, тожик клубларини ўзбек жамоаларига қараганда савияси пастроқ. Ҳозир бизга биринчи ўринда натижа эмас, тайёргарлик муҳим. Мураббийларимиз ҳар бир позицияни кучайтириш устида бош қотиришяпти. Таркибимизга бир қатор янги ўйинчилар қўшилишди. Улар билан тил топишиб кетиш муҳим. 50-60 фоизга янгиланяпти. Иккинчи давра бошлангунича барчамиз бир жамоа сифатида шаклланишимиз керак. Бу йиғинга асосан ўйин амалиётини оширгани келдик.

- Ҳа, таркибда ўзгаришлар юз беряпти. Бир қатор футболчилар кетди, сиз эса етакчилардан бири сифатида клубда қолдингиз. “Бухоро”дан кетиш ҳақида ўйламаганмисиз?

- Рости, айрим сабабларга кўра кетиш ниятим бор эди. Ўзимиздан ва хориж жамоаларидан ҳам таклифлар бўлди. Малайзия, Таиланд каби мамлакатлардан қизиқишлар бор эди. “Бухоро”да қолганимнинг биринчи фактори – бу Улуғбек Бақоев. Бухорода яхши жамоа қиламан деди. Бу йил клубни Суперлигада сақлаб қолсак, кейинги йили “Бухоро” янада кучли жамоага айланади.

Шуҳратбек Жўраев.