Рўзиқул Бердиев: "Насаф"нинг мақсади ҳеч қачон ўзгармайди"

Эртага Элит Осиё Чемпионлар Лигаси 7-туридан ўрин олган "Насаф" - "Аль Шорта" учрашуви бўлиб ўтади. Беллашув олдидан матбуот анжумани бўлиб ўтди.

Унда "аждарлар" устози Рўзиқул Бердиев ва Ойбек Рустамов қатнашди.

"Авваламбор, ассалому алайкум! Янги мавсумда сизлар билан кўришиб турганимдан хурсандмиз. Баъзида турнир жадвалида охирги ўринларда турган жамоаларнинг ўйини ҳар доим қизиқ бўлади. Эртанги ўйинда иккила жамоа ҳам ўз мавқеини тиклаш учун ва турнир жадвалидаги ҳолатини яхшилаш учун ҳаракат қилади.

Барча йигитлар учрашувга тайёр. Ўйлайманки, эртага натижа ҳам, баҳс ҳам мухлислар учун манзур бўлади.

Бунақа ўйинларда босимни ҳис қилиш керак эмас. Йигитлар майдонда эркин ҳаракат қилиши керак ва буни уқтирамиз. Йигитларни йиғинлар ва ундаги назорат баҳслари орқали тайёрладик. Бу йиғин учун режаларимиз бор эди ва бу тўлиқ амалга ошди. Жамоанинг ўйинини янги футболчилар билан шакллантиришга ҳаракат қилдик. Ёш ўйинчиларимизни кўрикдан ўтказиб олишимиз керак эди ва бундан ўтди. Ўйлайманки бу беллашувга яхши тайёргарлик кўрдик. 

Биз мана шу халқародаги ўйинлар орқали ҳам чемпионатга яхши тайёргарлик кўрамиз. Ўтган ўйинларимизга ҳам қарасангиз, кучли рақиблар бўлишига қарамасдан, йигитлар ортиқча босимсиз ҳаракат қилди. Ўз ўйинини кўрсатишга ҳаракат қилди ва эртага ҳам шундай бўлади, деб ўйлайман. 

Тўғри, тайёргарлигимиз жуда юқори даражада эмасдиру, аммо ўйинга йигитлар иштиёқи ва тайёргарлини кўрсатиши керак бўлади. Албатта натижа муҳимлигини тушуниб турибмиз. 

Жамоамизни 7-8 нафар футболчи тарк этди. Бу албатта жамоамиз учун катта йўқотиш. Лекин "Насаф" тажрибасида бунақа даврлар бўлган. "Насаф" бундан чиқиб кета олган. Ўйлайманки, бундан кейин хам шундай бўлади. 

"Насаф"да яхши шароит бор, яхши тизим бор ва бу ишлайди. Жамоа ҳар доим ўз олдига юқори мақсадларни қўйиб ҳаракат қилади. 

"Насаф"нинг мақсади ҳеч қачон ўзгармайди. Ўйлайманки, ҳозирги ҳолатимизда ҳам яхши таркибга эгамиз, ёшларни синовдан ўтказиб олдик. Улар билан уйғунлашган таркиб шакллантириб, юқори ўринлар учун курашамиз. 

Чунки Насаф ўз даражаси ва мавқейини ушлаб туришга ҳар доим ҳаракат қилган. Бундан кейин ҳам шундай бўлади", - деди Бердиев.

"Ассалому алайкум ҳаммага! Худо хоҳласа мураббийимиз айтгандек, эртанги ўйинга тайёрмиз. Янги жамоада илк учрашувим халқаро турнирга тўғри келмоқда. Мухлисларимизни хурсанд қиламиз, деган умиддамиз.

"Насаф" Ўзбекистондаги анчагина яхши жамоа. Ўсиш учун шу қарорни танладим", - деди Ойбек Рустамов.