Рўзиқул Бердиев: "Ўтган ўйиндан сўнг айтган гапларимни барча нотўғри тушунибди. Мен бошқа нарсани назарда тутган эдим" (матбуот анжумани)

Суперлиганинг 27-турида "Навбаҳор" ўз уйида "Насаф"ни қабул қилиб, 0:0 ҳисобидаги дурангга имзо чекди. "Аждарлар" эса яна қимматли 2 очкони йўқотди. Ушбу учрашувдан сўнг жамоа бош мураббийи Рўзиқул Бердиев матбуот анжуманида иштирок этиб, ўз фикрлари билан ўртоқлашди. 
 
"Навбаҳор" жамоаси бугун жуда яхши ҳимояланди. Бу уларнинг режаси эди. Шундай бўлса ҳам биз позицион ҳужумлар ярата олдик. Агар биринчи бўлимдаги ва иккинчи бўлимдаги айрим вазиятларни, масалан Чераннинг зарбаси дарвоза тўсинига теккан тўпи гол билан якунланганда вазифамиз яна енгиллашиши мумкин эди. Бугун албатта ғалаба учун майдонга тушган эдик, футболчиларга ҳам миннатдорчилик билдирдим. Чемпионат ҳали давом этади, ҳали якунланмади". 
 
Бугун биз асосан "Насаф" футболчиларида эмас, айнан сизда кўрдик - чемпионлик учун сиз кўпроқ ҳаракат қилмоқдасиз. Бунинг сабаблари нимада? 
 
"Ўйинимизда иштиёқ менда ҳам, футболчиларда ҳам етарлича эди. Ўзингиз кўриб турибсиз, ҳар 4 кунда бир ўйинда иштирок этмоқдамиз. Кечаги интервьюда ҳам айтиб ўтдим, менинг ҳолатимда бўлиш жуда оғир, учрашувлар учун футболчиларни тайёрлаш қийин. Биз бугун ўйин ўтказдик, 3 кундан сўнг Чемпионлар лигасида ҳам ўйнаймиз. Қайси таркибни майдонга туширишимни ҳам ўйлашим керак. У ерда ҳам плей-оффга чиқишимиз керак. Футболчиларнинг чарчоқлари ҳам бугунги учрашувда яққол кўринди. Балки шу нарса сизларга шундай кўрингандир. Агар жамоанинг жисмоний ҳолати яхшироқ бўлса, албатта натижаларимиз ҳам яхшироқ бўлар эди". 
 
Сўнгги учрашувдан сўнг анча очиқ гапирдингиз. Айнан ўша гапларда кимларни назарда тутган эдингиз? 
 
"Тўғриси, кўплаб сайтларни кузатмайман. Буни аввал ҳам айтганман. У гапларимни кўпчилик нотўғри тушунибди, лекин уни тўғри қабул қилишлари керак эди. Яширинча ҳеч нарса йўқ. Ҳар бир жамоанинг меҳнатини қадрлайман. Биласиз, "Нефтчи"нинг ОКМК билан ўйинида 20 мингга яқин мухлис ташриф буюрди. Кейин "Шўртан"га боришди. Ундан сўнг эса Тошкентга келиб, "Насаф" - ОКМК учрашувида бизга қарши мухлислик қилишди. Бугун ҳам 5 минг одам стадионга ташриф буюрган. Бу ҳақиқатдан қаҳрамонлик ҳисобланади. Мен асосан шуларни назарда тутган эдим". 
 
Ўша ОКМКга қарши тўқнашувда ўтирибмиз, 2 мингга яқин "Нефтчи"нинг мухлиси бизга қарши мухлислик қиляпти-да. Биз шуни ўйин давомида муҳокама қилдик ва матбуот анжуманида шуни айтган эдик. Ҳали турнир тугамади, ким чемпион бўлишидан қатъий назар мен табриклаган бўлар эдим. Сабаби, улар ҳам анча меҳнат қилишмоқда". 
 
Бу йил "Насаф" амалдаги чемпион сифатида чемпионлик учун курашмоқда. Олдинлари эса бундай босим йўқ эди. Ҳозир бу ҳам қандайдир таъсир кўрсатмоқдами? 
 
"Манимча, биз ўтган мавсум ҳар жабҳадан қолганларга қараганда устунроқ эдик. Ўтган йили 3 тур аввал чемпионликни расмийлаштирган эдик. Бу мавсум учун чемпионлик учун курашадиган жамоаларнинг сони кўпайди. Шунингдек, ўртамиёна клублардан ҳам очко олишга қийин бўлмоқда. Шу сабаб, албатта ҳимоя қилиш қийин бўлмоқда, лекин айтганимдек, сўнгги сонияларгача курашамиз". 
 
Бир неча йиллардан буён "Насаф"нинг мавсум сўнггида натижалари пасайиб бормоқда. Буни нима билан изоҳлайсиз? 
 
"Ҳозир сўнгги 2 йилни оладиган бўлсак - ўтган мавсум чемпионликни расмийлаштириб бўлганимиздан сўнг ўйинни ташлаб юборган эдик. Имкон қадар сўнгги тургача курашамиз". 
 
Бугун Ойбек Бозоров таркибда кўринмади. Бунга асосий сабаб нима? 
 
"Кеча касал бўлиб қолди. Шу боис, машғулотларда ҳам иштирок этмади ва бугунги учрашув учун қайдномага ҳам киритилмади. Бу катта йўқотиш эди".