Рубин Хебай - "Андижон"нинг жорий йилдаги энг яхши футболчиси!

Маълумки, “Андижон” матбуот хизмати жамоанинг 2023 йилдаги энг яхши футболчисини овоз бериш йўли орқали аниқлашни мақсад қилган.

Яқинда дастлабки сўровномани ўтказилди. Унда бу йилги мавсумда майдонга тушган барча футболчилар иштирок этишди ва ҳар бир позицияда энг кўп овоз тўплаганлари якуний ҳал қилувчи сўровномада иштирок этиш имкониятига эга бўлгандилар.

Шунга асосан дарвозабон Игорь Литовка, ҳимоячи Илдар Маматказин, ярим ҳимоячи Муҳаммадкарим Тоиров ва ҳужумчи Рубин Хебай “Андижон”нинг энг яхши футболчиси бўлиш учун иккинчи босқич сўровномасида қатнашдилар.

Унга кўра, иккинчи, ҳал қилувчи сўровномада жамоанинг албаниялик ҳужумчиси Рубин Хебай энг кўп овоз тўплади ва “Андижон”нинг 2023 йилдаги энг яхши футболчиси номига сазовор бўлди. 

Таъкидлаш керакки, Хебай жорий йилги мавсумда “Андижон” таркибида энг кўп ўйин ўтказган футболчига айланди. У ҳаммаси бўлиб, “Бургутлар” сафида 27 та баҳсда майдонга тушиб, рақиблар дарвозасига 14 та гол урди. Натижада жамоамизнинг мутлақ тўпурарига айланди. Шунингдек, унинг ҳисобида 3 та голли узатма ҳам бор.

Бундан ташқари, ЎзПФЛ томонидан йилнинг энг яхши футболчисини аниқлаш бўйича ўтказилаётган сўровноманинг якуний учлигидан ҳам Хебай ўрин олган ва унда Суперлиганинг ҳам энг яхши футболчиси бўлиш имконияти бор.

“Андижон” матбуот хизмати.