Рубин Хебай: "Мен дунёдаги энг бахтли одамман"

2023 йилги мавсумда “Андижон” шарафини ҳимоя қилган албаниялик легионер Рубин Хебай ўз савиясини ва даражасини намойиш қила олди.

Тўпурарлик салоҳиятини кўрсатишга муваффақ бўлган ҳужумчи шубҳасиз “Андижон”нинг 2023 йилдаги энг омадли трансфери бўлди. Бундай юқори савиядаги легионерга жиддий қизиқишлар бўлиши ҳам табиий.

Қуйида у билан уюштирилган суҳбатни ўқишингиз мумкин.

- Рубин, “Андижон”даги фаолиятингиз ҳақида нима дея оласиз? Сиз аввалида қандай тасаввур қилгандингиз ва якунда барчаси ўзингиз ўйлагандек бўлдими?

- Ўйлашимча, жуда яхши йил бўлди. Мухлислар мени ниҳоятда ҳурмат қилишди. Ишонаманки, жамоадошларим ажойиб ва биз келгусида янада яхши натижаларга эриша оламиз.

- Айтинг-чи, ўзбек футболида сизни нима ажаблантирди?

- Улар жисмоний жиҳатдан жуда ажойиб ҳолатда. Кўп меҳнат қилишни яхши кўришади.

- Қишки таътилни қандай ва қаерда ўтказяпсиз?

- Мен уйимда оилам ва дўстларим билан эдим. Кейин эса Лондонга кетдим.

- “Андижон” сафида 14 та гол уриб, жамоа тўпурари бўлдингиз ва клуб матбуот хизмати сўровномасига кўра, энг яхши футболчига ҳам айландингиз. Суперлигада ҳам энг яхши футболчи бўлиш учун асосий номзодлардан бирисиз. Легионер сифатида бундай натижалар ҳамда эътирофлар ёқимли бўлса керак-а?

- Албатта, мен дунёдаги энг бахтли одамман. Қачонки, яхши ишлаганимни ўзим ҳис қилсам ва атрофдагилар мени ҳурмат қилишларини сезсам, бу жуда ажойиб. Умид қиламанки, келгусида бундан ҳам яхши ўйинлар кўрсата оламан.

- Рубин, хизматингиз учун аниқ таклифлар бўляптими?

- Билишимча, менга бир қатор Европа ва Осиё жамоалари қизиқиш билдиришмоқда. Менимча, агентим бир қанча таклифларни олиб келса керак. Кўрамиз, қайси таклиф мен учун яхшироқ бўлади. Мен “Андижон”ни яхши кўраман, мухлислари ҳам ажойиб. Лекин, агар менда яхшироқ таклиф бўладиган бўлса, клуб билан келишган ҳолатда ушбу имкониятни қабул қилишга ҳаракат қиламан. Ана шунда жамоадан бироз қайғу билан ва қайтиб келишни хоҳлаган ҳолда кетаман, деб айтган бўлардим. Мен шундай ёшдаманки, бундай паллада имкон қадар юқорироқ имкониятларни ўзингиз учун қабул қилишингиз керак. Фаолиятимда иложи борича юқори даражада ўйнайдиган пайтда турибман.

- Андижонлик мухлислар учун нима дея оласиз?

- Агар молиявий тарафдан таклиф бир хил бўладиган бўлса, “Андижон”дан кетмайман. Бироқ ўртада катта фарқ бўлса, менимча, бундай пайтда мухлислар мени яхши тушунишади ва яхши кўрганлари учун бу қароримни қўллаб-қувватлашади, деб ўйлайман. Аммо кетадиган бўлсам, уларга ваъда бераманки, кун келиб яна “Андижон”га қайтаман.

- Аслида 2024 йил учун мақсадларингиз қандай?

- Менинг режаларим қўлимдан келганича ўз устимда қаттиқроқ ишлаш. Бу менинг ҳар йилги мақсадим. Ўйлайманки, Худонинг хоҳиши ва соғлиқ билан олдинда яна кўплаб голларни уришим мумкин.

Шуҳратбек Жўраев.