Руминия футболида "қора карточка" жорий этилди

Руминияда футбол чемпионатида янги турдаги жазо тизими жорий этилди – қора карточка. Ҳозирча у 7 ёшдан 16 ёшгача бўлган ўсмирлар ўйинларида синаб кўрилмоқда. Аслида, бу ташаббус айнан шу ёш тоифаси учун мўлжалланган, чунки карточка футболчиларга эмас, уларнинг ота-оналарига қаратилган.

Руминияда болалар ўйинларига келган айрим ота-оналарнинг ўзини тутиши кўпдан бери муаммога айланган. Майдон четида бақир-чақир, ҳакамга босим ўтказиш, ҳатто майдонга тушиб, «қандай ҳакамлик қилиш кераклигини» кўрсатишга уриниш ҳолатлари тез-тез учраб туради.

Қора карточка ана шундай ортиқча эҳтиросга берилган мухлисларга таъсир ўтказиш учун ҳуқуқий механизм сифатида ишлаб чиқилган. Унинг ёрдамида ҳакамлар ва ташкилотчилар ўйин жараёнига халақит бераётган ота-оналарга нисбатан расмий чора кўриш имкониятига эга бўлади.