Рустам Турдимуродов "Ворскла" билан ўйиндан сўнг: "Тўғриси, тезкор гол уришимни кутмагандим"

“Андижон” клуби Украинанинг “Ворскла” жамоасига қарши учрашувда 4:3 ҳисобида ғалаба қозонганидан хабардорсиз.

“Бургутлар” сафида ҳужумчи Рустам Турдимуродов 2-дақиқадаёқ тезкор гол урди. Бу орқали у жамоасининг Анталия йиғинидаги ўртоқлик учрашувлари доирасида илк голи муаллифига ҳам айланди.

Турдимуродов ушбу беллашув борасида ўз фикрлари билан ўртоқлашди.

- “Андижон”нинг Анталия йиғини доирасидаги иккинчи ўртоқлик учрашувида “Ворскла”ни мағлуб этди ва сиз жамоанинг илк голи муаллифига айландингиз. Тезкор гол уришингизни ўйлаганмидингиз?

- Тўғрисини айтсам, тезкор гол уришимни ўйламагандим. Кутилмаганда бўлди, вазият юз берди ва бундан фойдаланиб қолдим.

- Ўйин сизда қандай таассурот қолдирди?

- Биринчи учрашувдан кўра яхшироқ ва қизиқарлироқ ўтди. Машғулотларда қўллаётган услубларимизни ўйинда кўпроқ қўллай олдик, деб ўйлайман. Айнан биз хоҳлаган нарсаларимиз кўпроқ ўхшади.

- Лекин, билишимча сиз ҳам ҳисобнинг 4:3 билан якунланишини кутмаган бўлсангиз керак-а?

- Йўқ, бунисини кутмагандим.

- Бунгача “Ворскла”ни қандай тасаввур қилгандингиз?

- Ҳар доимгидек украин клубларидаги футболчилар бўйдор, гавдали, тезкор ва кучлироқ бўлишади. Шуни кутгандим. Аммо ўзимиздан устун томонларини кўрмадим. Уларга қарши биринчи марта ўйнадим.

- Ўйин давомида сизга ёққан ва ёқмаган жиҳатлари нимада бўлди?

- Ёққан томони айтиб ўтганимдек, машғулотда бажараётган усулларимиз ўйин давомида кўринди. Ёқмагани эса ўзим учун ҳали жисмонан тўлиқ тайёр бўлмаганимни айтган бўлардим. Аммо аста-секин жисмоний тарафдан ҳам қўшиб боряпман.

- Бундай йиғинда энг муҳими ўйин амалиётини шакллантириш учун ўртоқлик учрашувлари ҳисобланади. Олдинда яна бир қанча беллашувлар кутмоқда. Яна нималарга эътибор қаратилмоқда?

- Айтишим мумкинки, жисмоний ҳолат барчада яхши. Кўпроқ ҳимоядан ҳужумга ўтишга урғу қаратяпмиз. Ўйинларимиз кўп. Машғулотдаги усулларимизни ўйинга олиб чиқишга ҳаракат қиляпмиз...

- ...Ва шу ҳолат “Ворскла” билан учрашувда кўринди.

- Ҳа, ўйин мобайнида анча кўзга ташланди. Ўзим ҳам мазза қилиб ўйнадим. Анча ўхшади.