Самвел Бабаян: "Айбни аввало ўзимиздан қидиришимиз керак"

Cоcа-Cоlа Суперлига 15-тури доирасида сафарда “Металлург” билан дуранг ўйнаган “Навбаҳор” клуби бош мураббийи Самвел Бабаян дуранг, хатолар, жамоа сўнгги ўйинларда кам гол ургани ва навбатдаги рақиб ҳақида фикр билдирди.

“Бекободда бизни қийин ўйин кутиб турганини билардик. Улар қуйи поғоналарда бораётгани учун бизга қарши катта мотивация билан майдонга тушишди. Уларга очко керак эди. Жамоам деярли сўнгги дақиқаларгача ўйинга танланган режани ушлаб қолди. Фақат сўнгги дақиқаларда кўплаб хатолар қилганимиз туфайли гол ўтказиб ғалабани қўлдан чиқардик. Қолаверса, рақиб сўнгги сонияларгача курашгани таҳсинга сазовор. Айбни аввало ўзимиздан қидиришимиз керак. Камчилик ва хатолар устида ишлаймиз”, - дейди Бабаян.

“Ўйин охиридаги қизил карточкани кўриб чиқишимиз керак. Ўйинни кучайтириш учун майдонга тушган футболчи қизил карточка оляпти. Унинг ҳаракатларини кўриб чиқамиз, бу яхши вазият эмас”.

“Кам гол уришни режа қилмаганмиз. Ўйинларга бундай тавсия бермайман. Вазиятлар етарлича яратилмоқда, аммо уларни голга айлантиришда қийналяпмиз”.

“Биз атайин вақт чўзмадик. Бугунги тўхталишлар жароҳатлар туфайли юзага келди. Шифокорлар аралашуви талаб этилди”.

ПФЛ матбуот хизмати.