Seni davring tugadi!

​Har bir yaxshi narsaning oxiri bor. “Tuluza” klubi bosh murabbiy Karles Martines Novell bilan hamkorlik mavsum yakunida to‘xtatilishini rasmiy tasdiqladi. Dastlab murabbiy yordamchisi sifatida kelgan ispaniyalik mutaxassis, keyingi mavsumdan asosiy jamoani o‘z qo‘liga olgan edi. U klubni jami uchta to‘liq mavsum davomida boshqarib, barcha musobaqalarda 118 ta o‘yinda maydonga tushirdi.

​Uning klubdagi faoliyati, ayniqsa, 2023 yilda Frantsiya kubogini qo‘lga kiritishda (shtab a’zosi sifatida) hamda keyinchalik jamoani Yevropa arenalariga olib chiqib, “Tuluza”ni Frantsiya futbolida barqaror jamoaga aylantirgani bilan esda qoladigan bo‘ldi.

Klub rahbariyatining ta’kidlashicha, ushbu qaror umumiy qayta tashkil etish jarayoni doirasida qabul qilingan bo‘lib, murabbiyning sifatli mehnati va har kungi fidoyiligi yuqori baholangan.

​Rasmiy bayonotda “Tuluza” rahbariyati Martines Novellning professionalligi, sadoqati va mehnatini alohida e’tirof etdi. Klub mutasaddilari Olivye Kloarek va Viktor Bejani murabbiy bilan o‘rtadagi insoniy munosabatlar va o‘zaro hurmat yuqori darajada bo‘lganini ta’kidlashdi.

O‘z navbatida, kataloniyalik mutaxassis ham rahbarlar, futbolchilar, muxlislar va barcha-barchaga minnatdorchilik bildirdi va o‘tgan uch yilni “juda go‘zal va hissiyotlarga boy” davr deb atadi.

Novell “Tuluza”ni o‘z missiyasini bajargan holda va unutilmas xotiralar bilan tark etmoqda. Klub esa endi o‘z tarixida yangi sahifa ochishga tayyorgarlik ko‘rmoqda.