Сериал тугади! Дэвис "Бавария" билан шартномасини янгиламоқда

"Реал" 2025 йилнинг ёзида иккита катта трансферни текинга амалга оширишни режалаштирган. Шулардан бири Альфонсо Дэвисдир. Аммо Мадрид томони бу футболчидан қуруқ қолляпти. 

Давид Орнштейн хабар беришича, канадалик ҳимоячи мюнхенликлар билан шартномасини янгилаш арафасида турибди. Клуб унга 4 йиллик битим таклиф қилди. Кичик банди бўйича келишиб олинса, унинг қолгани расман эълон қилинади. Бир неча кун олдин 24 ёшли футболчининг "Реал"га ўтиши аниқ бўлди, деган эди Испаниянинг "Marca" нашри. Аммо бу маълумотлар энди тўғри эмас. 

Альфонсо анча вақтдан бери "Бавария" билан музокаралар олиб борди. Уни ўтган йилдан бери "қаймоқранглилар" таъқиб қилиб келди ва Дани Карвахалга муносиб ўринбосар сифатида кўрилаётганди. Узоқ муддатга сафдан чиққан испаниялик ҳимоячи ўрни айни пайтда Лукас Васкес билан тўлдириляпти ва бу мухлисларга унчалик ҳам ёқаётгани йўқ. Айниқса, сўнгги "эл-класико"дан кейин у яна хейт қилина бошлади. Раҳбарият эса бунга ечим изламаётганди, чунки улар Дэвиснинг келишига ишонишар эди. Энди вазият ўзгариши мумкин. 

2019 йилдан бери Мюнхен клубида тўп тепадиган Альфонсо сўнгги марта 2020 йилда шартномасини 2025 йилгача узайтирганди. Жамоа ҳам уни текинга қўйиб юборишни истамади бу учун кўп ҳаракат қилди.