Шакиранинг икки миллион мухлиси Пикенинг “мазасини қочирди”

Бразилиянинг Рио-де-Жанейро шаҳридаги Шакира концертида тахминан икки миллион мухлис “Барселона”нинг собиқ ҳимоячиси Жерар Пикени ҳақорат қилди.

Бу ҳақда Haberler нашри маълумот тарқатди.

Колумбиялик хонанда “Копакабана” пляжида бепул шоу ўтказди. Чиқиш вақтида у собиқ севгилиси Жерар Пикега қаратилган гап айтди.

- Бразилияда тахминан 20 миллион ёлғиз она борлигини биласизми? Улар оилаларини таъминлаш учун жуда кўп меҳнат қилишади. Мен ҳам улардан бириман, - деди Шакира.

Шундан сўнг томошабинларнинг бир қисми мусиқа оҳангига мос равишда Пикега қаратилган ҳақоратли шиорларни қичқира бошлади.

Пике ва Шакира 2022 йилда футболчининг хиёнати ҳақидаги гап-сўзлар ортидан ажрашган. Қўшиқчининг собиқ футболчидан икки нафар ўғли бор. Испаниялик футболчи 2022 йил ноябрида профессионал фаолиятини якунлаган.