"Шальке 04”нинг собиқ футболчиси "Нефтчи"га келди!

"Нефтчи"да германиялик мутахассис иш бошлади. Бу ҳақда клуб матбуот хизмати хабар берди.

" “Нефтчи” футбол клуби немис мутахассиси Ҳанс-Юрген Гедени ёрдамчи мураббий этиб тайинланганлигини эълон қилади. Ҳанс-Юрген Геде 1956 йилда Германиянинг Гельзенкирхен шаҳрида туғилган.

Футболчилик фаолияти:
Ҳанс-Юрген Геде профессионал фаолиятини “Шалке 04” клубида бошлаган. Кейинчалик “Пройссен” ва “Фортуна Дюссельдорф” жамоаларида тўп сурган. Айниқса “Фортуна” сафида узоқ йиллар етакчи футболчи ва сардор бўлиб, 343 та ўйинда майдонга тушиб, 48 та гол муаллифи бўлган.

Мураббийлик фаолияти:
Геде мураббийлик фаолиятини 1991 йилда “Фортуна Дюссельдорф”да бошлаган. Шундан сўнг Эроннинг “Персеполис” клубини бошқарган, ёшлар термасига раҳбарлик қилган ва бир қатор Осиё ва Европa клубларида фаолият олиб борган.

Халқаро тажриба:
У турли йилларда Эрон, Баҳрайн, Малайзия, Озарбайжон, Ливия, Мянма ва Германия клубларида фаолият юритган. Шунингдек, мураббий Ўзбекистондаги фаолияти орқали ҳам аллақачон таниш бўлиб улгурган. Геде 2003–2004 йилларда Ўзбекистон миллий терма жамоасида ёрдамчи, кейин эса бош мураббий сифатида ҳам ишлаган.

Бугун эса Ҳанс-Юрген Геде ўзининг катта тажрибасини “Нефтчи” жамоаси равнақи йўлида сафарбар этади. Ҳанс-Юрген Гедега янги мавсумда омад ёр бўлишини тилаб қоламиз!",—дейилади фарғоналиклар баёнотида.