Шомуродов дебютга қандай тайёрланмоқда ёхуд у қачон майдонга тушади? (фото)

Ўзбекистоннинг  бугунги кундаги энг зўр ҳужумчиси Элдор Шомуродов “Женоа” жамоаси таркибида биринчи машғулотини ўтказди.

Маълумки, Элдор Шомуродов сентябрь ойининг охирида “Женоа” таклифини қабул қилиб, Россия премьер-лигасида иштирок этаётган “Ростов” таркибини тарк этган эди. Ҳамюртимиз октябрь ойининг илк кунларида  Генуя шаҳри жамоасида кўрикдан ўтиб, шартнома имзолаш учун етиб борганди.

Бироқ, кутилмаганда “Женоа” футболчилари ўртасида коронавирус инфекцияси тарқалиб кетиб, асосий таркибнинг 17 нафар аъзоси карантин ва шифокорлар назоратига олинди. Натижада “Женоа”нинг “Торино”га қарши ўтказиладиган учрашуви бошқа муддатга кўчирилди. Барча машғулотлар бекор қилинди.

Элдор Шомуродов Генуяда бир неча кун қолган бўлса-да, жамоа таркибига қўшила олмади. Кейин вақтни бекор ўтказмаслик учун Тошкентга келиб, Ўзбекистон миллий терма жамоаси йиғинида иштирок этди.

Ҳужумчимиз икки қитъа орасида қисқа муддат ичида бир неча авиапарвозни ўтказиб, толиққанига қарамай, терма жамоамизнинг Эрон футболчиларига қарши ўтказилган халқаро ўртоқлик ўйинида майдонга тушди.

Учрашувда Элдор юқори классли ҳужумчи эканини кўрсатиб, мураккаб вазиятда  рақиб дарвозасини ишғол қилди. Бу Шомуродовнинг терма жамоамиз таркибидаги 44-учрашувдаги 21-голи сифатида қайд этилди.

Ушбу учрашувдан сўнг, “Женоа” раҳбарияти Элдор Шомуродовнинг жамоага қўшилиши, Италияда ишлаш ҳуқуқини берадиган визани расмийлаштириши ва Генуя шаҳрига жойлашиб олиши каби ташкилий масалаларни ҳал этиш мақсадида Ўзбекистон футбол ассоциацияси раҳбариятидан ҳужумчини йиғиндан эрта қўйиб юборишни илтимос қилди.

Натижада йиғинни эрта тарк этган Элдор Шомуродов “Женоа” футболчилари сафига қўшилди. Ўзбекистонлик ҳужумчи жамоадошлари билан бирга дастлабки йиғинни ҳам ўтказди.

“Женоа” матбуот хизмати коронавирусдан соғайган футболчилар машғулотларга киришганини ва жисмоний ҳолатини тиклашга ҳаракат қилаётганини маълум қилди.

Генуяликлар А Сериянинг навбатдаги учрашувини 19 октябрь куни сафарда “Верона” жамоасига қарши ўтказади.

Айнан мана шу учрашувда Элдор Шомуродов Европанинг эг кучли беш чемпионатидан бири ҳисобланган А Сериядаги дебютини нишонлайди. Ҳужумчимиз янги жамоаси таркибида ҳали ҳеч ким танламаган 61-рақамда ўйнайди. Аввалроқ, клуб расмий сайти Шомуродов номи ва рақами туширилган футболкаларга буюртма тушаётгани ва либосни электрон савдо орқали харид қилиш мумкинлигини эълон қилганди.