Шомуродов яққол ажралиб турибди!

Жорий йилнинг 16 ноябрь куни Тошкентдаги “Пахтакор” аренасида Ўзбекистон ва  Қозоғистон миллий терма жамоалари ўртасида халқаро ўртоқлик учрашуви ўтказилади.

Қозоғистон футбол федерацияси бу маълумотни тасдиқлагани ҳақида Sports.kz нашри ҳам хабар тарқатди.

Бу борада Қозоғистон миллий терма жамоаси бош мураббийи Магомед Адиев ўз фикр-мулоҳазаларини билдирди.

- Ўзбекистон миллий терма жамоасини “Евро-2024” саралаш циклига тайёргарлик кўриш жараёнида жуда яхши рақиб, деб ҳисоблайман. Бўлажак ўйин мураббийлар учун жуда кўп маълумот тўплаш имконини беради.

Ўзбекистон жуда сифатли ўйинчиларга эга. Европа чемпионатининг саралаш учрашувларида ишонч билдирадиган футболчиларимизнинг имкониятлари ва салоҳиятларини синовдан ўтказиб олишни истаймиз.

Бўлажак ўйин жуда қизиқарли ўтишига аминман, - деди Магомед Адиев.

Халқаро ўртоқлик учрашуви олдидан мутахассислар Transfermarkt.de портали маълумотлари асосида ҳар икки терма жамоанинг энг қиммат ўйинчилари трансфер нархини солиштириб чиқди.

Унга кўра, Ўзбекистон миллий терма жамоаси вакилларининг умумий трансфер суммаси 25,65 миллион еврони ташкил қилмоқда.

Қозоғистон бош жамоасига жалб қилиб келинаётган футболчиларнинг умумий нархи 17,15 миллион еврога тенг. Кўриниб турибдики, умумий кўрсаткичлар бўйича ҳамюртларимиз бўлажак рақибдан анча қиммат туради.

Трансфер суммасининг қимматлиги бўйича ҳар икки терма жамоа аъзолари ўртасида Элдор Шомуродов яққол ажралиб турибди. Айни  пайтда “Рома” ҳужумчисининг трансфер суммаси 8 миллион еврога тенг.

Ўзбекистон миллий терма жамоасида бу борада иккинчи кўрсаткич Европадаги яна бир вакилимиз – Отабек Шукуровга тегишли. Туркиянинг “Фатиҳ Карагюмрюк” жамоаси шарафини ҳимоя қилаётган ярим ҳимоячи уч миллион еврога баҳоланмоқда.

Қозоғистон миллий терма жамоасининг энг қиммат ўйинчиси Россия премьер-лигасида ЦСКА шарафини ҳимоя қилаётган Бахтиёр Зайнутдинов ҳисобланади. Унинг трансфер суммаси 3,5 миллион еврога тенглаштирилган. Кейинги ўринда Россия чемпиони “Зенит”да ўйнаётган ҳимоячи Нурали Алип қайд этилган. Унинг трансфер суммаси 1,5 миллион еврони ташкил қилмоқда.

Ўзбекистон ва Қозоғистон миллий терма жамоалари ўзаро олти маротаба тўқнаш келган. Шу учрашувлардан иккитасида ҳамюртларимиз, биттасида қўшниларимиз қўли баланд келган. Яна учта баҳсда кучлар тенг келган.

“Рома”га қимматга тушган баҳсда Шомуродовнинг ўйини қандай баҳоланди?

Моуриньо Шомуродовни нега ўйнатмаётгани маълум бўлди

Шомуродов, тайёрлан!