Шомуродовни бошқа футболчига алмаштиришмоқчи!

“Рома” ёзда ҳужум чизиғида катта ўзгаришлар қилишига тўғри келади. Ҳозир жамоанинг олдинги чизиғида ўйнаётган Пауло Дибалага “Манчестер Юнайтед”, “Интер”, “Реал” каби катта клублар жиддий қизиқиш билдирмоқда. Жаҳон чемпионининг римликлар билан яна икки йиллик шартномаси бўлса-да, Италиядан ташқаридан чиққан харидорлар уни 20 миллион евро эвазига трансфер қилиши мумкин. 

Аргентиналик юлдузнинг ўзи ҳам "Рома"дан мавқеи ва даражаси анча баланд бўлган суперклубларда тўп тепишга қарши бўлмайди, албатта. 

"Рома" олдида бу мавсум ўзини кўрсата олмаётган 25 ёшли англиялик ҳужумчи Тэмми Абрахам масаласи ҳам кўндаланг бўлиб турибди. "Челси"дан 40 миллион еврога олиб келинган форвард ҳам ёзда ўз юртига қайтиб кетиши кутиляпти. Унинг олдида ўз юртидан бир неча жамоалар, хусусан, “Манчестер Юнайтед”, “Челси”, “Ливерпуль” ва “Астон Вилла” вариантлари бор.

Андреа Белотти ва Стефан Эл-Шааравининг амалдаги шартномаси 30 июнь куни якунланади ва уларга ҳали янги битим таклиф қилингани йўқ.

Бош мураббий Жозе Моуриньо ўз одатига кўра, спорт директори Тьягу Пинтодан катта юлдузларни олиб келишни сўрамоқда. Португалиялик мутахассис Римда Ромелу Лукаку, Мауро Икарди, Карим Бензема каби юлдузларни кўрмоқчи.

Тьягу Пинто эса, уддалаш осон бўлган трансферларни режалаштирмоқда. Италия футболининг нуфузли манбаларидан бири footballnews24.it сайти журналисти Франческо Сегатори римликлар спорт директори “Специя” тўпурари Мбала Нзолага кўз тикаётгани ҳақида хабар берди.

Яна бир манба – calciomercato.com  Тьягу Пинто бу трансферни амалга ошириш схемасини тузиб қўйганини ёзди.

Маълумки, Элдор Шомуродов мавсум якунланиши билан “Специя”дан яна “Рома”га қайтади. Тьягу Пинто келаси мавсум олдидан ўзбек ҳужумчисининг ҳам масаласини ҳал қилиши лозим. Португалиялик мутахассис легионеримизни “Специя”да қолдириб, ўрнига Мбала Нзолани олиб келмоқчи.

Бу йўл орқали у “бир ўқ билан икки қуённи уради”. Чунки “Специя” яхши таклиф бўлса, Нзолани сотиб юборишга тайёр. Лигурияликлар “яхши таклиф”, деганда 18 миллион евро бадал пулини назарда тутмоқда. Табиийки, Нзола кетса, ўрнига ҳужумчи керак. А Серияда ўзини кўрсата бошлаган Элдор Шомуродов уларни тўлиқ қониқтиради.

2020 йилдан бери “Специя” аъзоси ҳисобланган Мбала Нзоланинг амалдаги шартномаси келаси йили ёзда тугайди. Клуб у билан келишувни янгиламоқчи. Лекин юқорида айтилганидек яхши таклиф бўлса, анголалик ҳужумчининг йўлини тўсишмайди.

А Серия ва мамлакат кубоши ўйинларида 14  та гол ва 3 та ассист қайд этган ҳужумчига “Специя”дан кучли жамоалардан таклиф бўлиши табиий ҳолат сифатида баҳоланоқда. Айни пайтда “Рома”дан ташқари “Вест Хэм” африкалик футболчини ўз сафига қўшиб олмоқчи.

Элдор Шомуродовнинг келаси мавсумни қаерда бошлаши кўп жиҳатдан “Рома” бош мураббийи Жозе Моуриньога боғлиқ бўлади. Бу мутахассис бир неча бор ҳужумчимизни бошқа жамоаларга тўлиқ трансфер қилинишига қаршилик қилди. Демак, бирор мўлжали бўлса керак. Қолаверса, Шомуродовни “Специя”га кузатиб қўйишдан олдин, Моуриньо Элдор фақат ўйин амалиётига эга бўлиш учун кетаётгани ва ёзда қайтиб келтишини алоҳида таъкидлаган.

Мавсум якунланиши билан ёзги трансфер бозори очилади. Бу жараёнда Шомуродов олдида ҳам яна янги вариантлар чиқиши табиий. Элдорнинг асосий вазифаси эса, чемпионатнинг қолган ўйинларида ўз салоҳияти ва имкониятларини намойиш этишдан иборат.

Энди Жозе Моуриньо ва Тьягу Пинто режалари қай даражада амалга ошишини вақт кўрсатади. Балки “Специя”нинг Элдор Шомуродов ва Мбала Нзоладан таркиб топган ҳужум тандеми келаси мавсум “Рома” шарафини ҳимоя қилар...

Шомуродовдан гол “еган” машҳур дарвозабон ўзига янги жамоа қидиради!

“Специя” фанатлари Шомуродов голига қандай муносабат билдирди?