Шомуродовни олмасак бўлмайди! Элдор учун курашда фаворит ўзгарди

Қишки трансферлар ойнасининг сўнгги кунларида “Рома” ҳужумчиси Элдор Шомуродов учун курашаётган клублар орасида “Эмполи” фаворит сифатида тилга олинаётган эди.

Тоскана шаҳри шарафини ҳимоя қилаётган клуб мутасаддилари 29 ёшли ўзбек футболчисини ижарага олиш мақсадида “Рома” билан музокараларни давом эттирмоқда.

Бироқ сўнгги маълумотларга қараганда, Шомуродовга даъвогарлик қилаётган клублар рақобатида етакчилик “Венеция” томонига ўтди.

Таниқли инсайдер Жанлука Ди Марционинг таъкидлашича,  А Серияда қолиш учун курашаётган “Венеция” асосий тўпурари Жоэл Похьянпалони “Палермо”га трансфер қилишга яқин турибди. Финляндиялик ҳужумчи венецияликларнинг асосий тўпурари ҳисобланади ва жорий мавсум 19 та учрашувда ўз ҳисобига еттита тўп ёздириб қўйган.

Похьянпало яхшироқ маош эвазига В Серияда ўйнаётган “Палермо”га кўчиб ўтишга қарор қилди. Айни пайтда икки клуб ўртасида музокаралар ижобий якунланиш арафасида турибди.

“Венеция” ўз тўпурарининг ўрнини тўлдириш мақсадида нишондаги ҳужумчилар орасида Элдор Шомуродовни биринчи ўринга қўйган ва уни “Рома”дан олиш имкониятларини ўрганмоқда.

Ўзбекистон миллий терма жамоаси сардори ва “Рома” ҳужумчиси Элдор Шомуродов атрофидаги вазиятни бошқа манбалар ҳам муҳокама қилмоқда.

- Қишки трансферлар бозори авж олаётган паллада “Рома”да ўйнаётган ўзбекистонлик форвард Элдор Шомуродов ҳам кўпчиликнинг диққат марказида турибди. Рим клуби мутасаддилари таркибда жиддий ўзгариш қилишга бел боғлаган ва долзарб масалалар орасида чиқиш трансферлари ҳам бор.

Асосий тўпурари Жоэл Похьянпалонинг  ўрнига Элдор Шомуродовни олиб келишни кўзлаётган “Венеция” бу ўйинчига қолган даъвогарларга қараганда яхшироқ молиявий имкониятлар таклиф қилиши мумкин.

Шунга қарамай, рақобат кучли бўлади. Чунки “Эмполи” Элдор Шомуродовни ижарага олиш бўйича пойтахтликлар билан музокараларни бошлаб юборган.

Демак, трансфер ойнасининг сўнгги кунлари ўзбек ҳужумчиси атрофидаги вазият анча қизғин бўлиши кутилмоқда, - деб ёзди farantube.it сайти.

Таъкидлар жоизки, А Сериянинг мусобақа жадвалида 21-тур якунларига кўра, “Венеция” 15 очко билан 19-поғонани эгаллаб турибди. Венецияликлар юқори дивизиондаги жойини сақлаб қолиш учун вазиятни ўзгартириши шарт. Жамоанинг ҳужум чизиғида муаммо кўп. Таркибдаги уч форварда фақатгина клубдан кетаётган Жоль Похьянпало рақиблар дарвозасига йўл топа олган холос.

“Эмполи” мусобақа жадвалида 20 очко билан 15-ўринда бораётганига қарамай, бу жамоани хавфли ҳудуддан атиги бир очко ажратиб турибди. Роберто Д’Аверса шогирдлари ҳам энг кам гол урган жамоалардан ҳисобланади. Олдинги чизиқнинг олтита ўйинчидан тенг ярми ҳали ҳам голлар ҳисобини очгани йўқ.

Элдор Шомуродовга даъвогарлар орасида “Кальяри” ҳам бор. Бироқ Сардиния клуби ўзбек футболчисини жамоага қайтириш учун ҳали айтарли ҳаракатларга киришгани йўқ.

Эслатиб ўтамиз, тажрибали легионеримиз жорий мавсумда жами 15 маротаба майдонга тушиб, рақиблар дарвозасини икки маротаба ишғол қилган ва жамоадошларига битта голли пас узатган. Тransfermarkt портали ўзбекистонлик ҳужумчини 4 миллион еврога баҳоламоқда.

“Манчестер Сити” мухлислари Ҳусановни қандай қабул қилди?

Ҳусановнинг трансфери ўзбек футболчилари учун Европага йўл очадими?

Шомуродовга “ҳужум” кучайди! Элдор фаолиятини қаерда давом эттиради?

Ҳусановнинг трансфер суммаси адолатли бўлганига қарамай, бизга алам қилганди...

Машҳур юлдуз Ҳусановнинг “Манчестер Сити”га ўтганини қандай баҳолади?