“Сити” марказий ҳимоячига катта шартнома берадиган бўлди

“Манчестер Сити” раҳбарияти хорватиялик ҳимоячи Йошко Гвардиолни жамоада сақлаб қолиш ниятида. Бу ҳақда Sportske novosti нашри хабар бермоқда.

Манба маълумотига кўра, “шаҳарликлар” Гвардиол учун маоши сезиларли даражада оширилган ва узоқ муддатли янги шартнома тайёрламоқда.

Таъкидланишича, ўйинчига Мадриднинг “Реал” клуби жиддий қизиқмоқда, бироқ “Манчестер Сити” универсал ҳимоячини сақлаб қолишга қатъий қарор қилган.

2023 йилда инглиз гранди Гвардиолни “РБ Лейпциг” клубидан 90 миллион еврога сотиб олган эди.

Бу мавсумда 24 ёшли хорватиялик футболчи барча мусобақаларда 23 та ўйин ўтказиб, икки гол урди ва бешта голли узатма берди. Айни пайтда у оғир жароҳатдан тикланмоқда.