“Сити” юлдузи пул учун кетмоқчи

“Манчестер Сити”нинг янги сардори Бернарду Силва жорий мавсум охирида клубни тарк этиш ҳақида бош қотиряпти. Португалиялик ўйинчининг амалдаги шартномаси 30 июнь куни якунланади.

Хосеп Гвардиола ҳужумкор футболчи ҳақидаги фикрларини ўзгартирди. Ўтган мавсум Бернарду Силва билан хайрлашишга тайёр бўлган мураббий энди клуб унга узоқ муддатли шартнома беришини истаяпти.

TALKSPORT нашрининг маълум қилишича, томонларнинг ҳамкорлик давом эттириш имконияти жуда паст  баҳоланмоқда. Чунки 31 ёшли футболчи фаолиятининг охирги босқичида кўпроқ маблағ жамғариб олмоқчи.

Бернарду Силва ёзда ўзига жиддий қизиқиш билдираётган Саудия Арабистони клубларидан бирига кўчиб ўтишни режа қилган.

Моҳир ўйинчи “Манчестер Сити”да 2017 йилдан бери ўйнаб келмоқда ва клублар миқёсида барча нуфузли мусобақалар бош совринини қўлга киритиб бўлган.