Сиёсий қотилликларга бориб тақалувчи имо-ишора! Европа матбуотида шовқин кўтарган Демиралнинг жести ва унинг оқибатлари

Туркия терма жамоаси ҳимоячиси Мерих Демирал миллатчилик жести учун икки беллашувга дисквалиифкация қилинди. 

Шу тариқа, футболчи "Евро-2024" чорак финалидан ўрин олган Нидерландияга қарши беллашувни, шунингдек, эҳтимолий ярим финални ўтказиб юборади. 

"Евро-2024" доирасида Австрияга 59-дақиқада гол урган ҳимоячи икки қўли билан қуйидагича услубда голни нишонлади. 



Демиралнинг жести - "бўри салюти" ("Кулранг бўрилар" (bozkurtlar) ташкилоти аъзолари бир-бирлари билан шундай саломлашади) деб номланади. Учрашувдан сўнг футболчининг ўзи ижтимоий тармоққа ушбу имо-ишора акс этган суратини жойлаштириб, суратга: "Ўзини турк деб атаган одам нақадар бахтиёр", - дея изоҳ қолдирди. Бу ибора Туркия Республикасининг биринчи президенти ва замонаий давлат асосчиси Мустафо Камол Отатуркга тегишли. Мазкур сўзлар миллатчиликнинг норасмий шиори саналади. 

Футболчининг ўзи беллашувдан сўнг микс зонада жест ҳақида шундай деди: "Бу менинг турклигим билан боғлиқ. Мен турк эканлигимдан жуда ҳам фахрланаман. Қарасам, трибунадагилар ҳам ушбу имо-ишорани кўрсатишяпти экан. Ўйлайманки, бу ишорани яна бир бор кўрсатиш имкониятига эга бўламан".

Бундан ташқари, Англия терма жамоаси ярим ҳимоячиси Жуд Беллингем ҳам УЕФА томонидан жазоланади. Футболчи дисквалификациядан қутилиб қолди, аммо Словакияга қарши (2:1) беллашувдаги одобсиз ишораси учун камида 20 минг евро миқдорда жаримага тортилиши таъкидланмоқда. Жуднинг ўзи ушбу жестини дўстлар ўртасидаги ўзаро хазил деб атади. 



"Кулранг бўрилар" ташкилоти ҳақида

"Кулранг бўрилар"нинг мазкур рамзи тасодифан танланмаган. Маҳаллий мифологияга кўра, туркий халқлар кулранг бўри аждоди, яъни Асенадан келиб чиққан дейилади. 

"Кулранг бўрилар" ташкилоти ўтган асрнинг 60 йилларида турк миллатчи ҳаракати партияси қошида вужудга келган. Ушбу гуруҳ аъзолари бир неча бор сиёсий қотиллик ва террорчилик хуружларида, жумладан, 1981 йилда Рим Папаси Иоанн Павел II'га нисбатан уюштирилган суиқасдда иштирок этган.  

Ушбу ташкилот Францияда ноқонуний саналади, Австрияда эса унинг рамзи қонунан тақиқланган. 


 

Карим Худайқулов тайёрлади