“Сўраган пулимизни беринг. Йўқса, у кетмайди!”

Трансфер бозорида энг фаол бўлиб турган “аристократлар” раҳбарияти Кай Хаверц масаласида бир қарорга кела олмаяпти. Яъни, улар “Байер” хавбеки учун сўралаётган маблағни тўлашга қийналмоқда. Леверкузенликлар 2 йиллик шартномаси бор Хаверцни 76 миллион евродан камига қўйиб юбормасликларини маълум қилган. Ўз навбатида, аллақачон умумий миқдорда 93 миллион евро харажат қилиб қўйган “Челси” раҳбарлари бу сумма бироз камайтирилишидан умидвор.

“Ундаги истеъдод билан жаҳоннинг исталган клубида муваффақиятли ўйнаш мумкин. Бизда бир нечта гранд жамоалардан таклифлар мавжуд. Шу жумладан, “Челси”дан ҳам. Бироқ сўраган пулимизни бермасангиз, у кетмайди. Унда яна 2 йиллик шартнома бор ва унинг шу ерда эканлиги, албатта, бизни хурсанд қилади. Ҳозир бор эътиборимизни “Интер” билан бўладиган баҳсга қаратишимиз керак. Келажакда нималар бўлишини ҳеч ким билмайди”, дея “Байер” бош мураббийи Петер Бос ўз фикрларини билдириб ўтди.

Маълумот учун, 21 ёшли германиялик ярим ҳимоячи бу мавсум барча турнирларда 44 ўйинда майдонга тушиб, ўз ҳисобига 17 та гол ва 8 ассист ёздириб қўйишга эришган.