SPORTS.uz талқини бўйича Суперлига 12-тур рамзий терма жамоаси

Дарвозабон: Игнатий Нестеров

“Қизилқум”нинг хотиржамлиги ёмон оқибатларга олиб келиши мумкин эди. Жадвал нуқтаи назаридан анча принципиал жамоалар ўртасидаги баҳснинг бой берилиши жамоа раҳбариятини яхшигина ранжитиши аниқ эди. Трансферлар ойнаси вақтида жамоага олиб келинган юқори даражали футболчилар секин-аста ўз сўзини айта бошлади. Айниқса, собиқ миллий терма жамоа дарвозабонининг улкан тажрибаси навоийликларга асқатмоқда. Иккинчи тайм ўрталарида Игнатий кетма-кет 3 та голли зарбани қайтаришга муваффақ бўлди. Гол урилган вазиятда ҳам уни айблаш ноўрин. У дастлабки зарбани қайтарди. Қайтган тўпни эса ҳимоячилар томонидан қўриқланмаган “Сўғдиёна” футболчиси дарвозага жойлаб қўйди.

Марказий ҳимоячи: Иван Йосович

Шоҳназар Норбеков ва Суҳроб Бердиев ҳимоячилардан гол уриш сир-асрорларини ўрганишни бошлаб юборса ҳам бўлаверади. Чунки мудофаа чизиғи вакиллари улардан бир неча баробар кўп голларни уриб бўлишди. “Андижон”га қарши водий дербисини ҳам ҳимоячиларнинг голлари ҳал қилиб қўйди.
Қўқонликларнинг ҳимоядаги ишончли ҳаракатлари ҳақида эса гапириб ўтиришнинг ҳожати йўқ. Ушбу клуб номи жаранг сочар экан, тартибли ҳимоявий футбол кўрсатувчи жамоа кўз олдимизга келадиган бўлиб қолган.

Марказий ҳимоячи: Самандар Шукуриллаев

“Машъал” ўта қийин учрашувда “Бухоро”дан устун келди. Дарвозабон Раҳимжон Давронов ҳам рамзий терма жамоамиз лонг-листида бор эди. Аммо Шукуриллаев бошлиқ муборакликлар ҳимояси Давроновдан ҳам кўпроқ тер тўкишга мажбур бўлди. Айниқса, Азизбек Омонов уларни тез-тез безовта қилиб турди. Шукуриллаевдан бир нечта муваффақиятли “подкат”ларнинг гувоҳига ҳам айландик.

Марказий ҳимоячи: Игорь Голбан

Наманганликлар сал бўлмаса мавсумда илк маротаба АГМКни мағлуб этган жамоага айланиши мумкин эди. Улар биринчи таймдаги Турғунбоевнинг супер зарбасидан сўнг ҳисобда олдинга чиқиб олди. Учрашувнинг иккинчи қисми олмалиқликларнинг штурми остида ўтди. Бир вазиятда Голбан дарвоза чизиғи устидан тўпни олиб чиқишга ҳам мажбур бўлди. Жокич учрашув якуни арафасида гол киритган вазиятда ҳам Голбан имкон борича тўпни гавдаси билан тўхтатиб қолишга ҳаракат қилди. Аммо қўлларини орқасига яшириб олгани учунми, буни уддалай билмади.

Таянч ярим ҳимоячиси: Йован Жокич

АГМКнинг мағлубиятсиз сериясини сақлаб қолган гол муаллифи терма жамоамиздан жой олиши керак эди. У тўпга зарба берган вазият анча мураккаб эди. Бундай ҳал қилувчи вазиятда таянч ярим ҳимоячиси жарима майдони ичида таваккал зарбани амалга ошириши доим ҳам кузатилавермайди. Жокич эса ўз вақтида зарба бера олди ва айнан мана шу қарор ўзини оқлаб, жамоасини мағлубиятдан сақлаб қолди.

Марказий ярим ҳимоячи: Элла

Муборакликларнинг африкалик легионери қарши ҳужумларда бухороликларни роса қийнади. Аммо Муртазоев у тақдим этган вазиятларни голга айлантира олмади. Акс ҳолда, “Машъал” учрашув сўнгини бу қадар асабий ўтказмаган бўларди. У ақлли ва чиройли ҳаракатлари билан майдонда ажралиб турди. Легионерларимиз ҳам чемпионатимиз мулки. Уларнинг-да ажойиб ўйинидан қувонамиз.

Марказий ярим ҳимоячи: Ойбек Бозоров

Ойбек “Насаф”да янги Геворкянга айланиб боряпти. Жамоа унинг калит узатмалари ва хавфли зарбалари орқали ҳужум ташкиллаштиришга ўрганиб қолди. Унга Бердиев майдонда эркин ҳаракат қилиш имконини берган. Гоҳ қанотда, гоҳ марказда барибир Бозоров ўзининг ажойиб ўйинини намойиш этишда давом этмоқда.

Чап қанот вингери: Жалолиддин Машарипов

“Локо”га 7 та гол урган жамоадан вакилларни анча куттириб қўйдик. “Пахтакор”нинг салоҳияти барчага маълум ва шунинг учун ҳам уларни ортиқча эътироф этиб ўтирмадик. Машарипов ушбу учрашувда барчасини ҳал қилиб қўйди. Ўйиндан кейин берган интервьюсида легионер сифатида ўйнаш истаги борлигини ҳам айтиб ўтди. Наҳотки, Европанинг синчков скаутлари Жалолиддиннинг истеъдодини илғай олмаган бўлса.

Ўнг қанот вингери: Ихтиёр Тошпўлатов

Бекободликларни мағлубиятдан қутқариб қолган дубль муаллифига ўнг қанотни ишониб топширамиз. Ихтиёр керакли пайтда керакли жойда пайдо бўла олди ва жамоасига жуда муҳим 3 очкони олиб берди. Равшан Ҳайдаров эса “Сурхон”да яхши жамоа шакллантира бошлагани кўриниб турибди. Бирозгина омад етишмай қолгани ва Тошпўлатовнинг омадли ўйини унга ҳалақит берди.

Марказий ҳужумчи: Иброҳим Гбадамоси Томива

Кеча ушбу легионернинг Ўзбекистондаги муваффақиятли дебюти нигерияликларнинг Суперлигамизга эътибор қаратишига сабаб бўлганини айтгандик. Ушбу учрашувдаги ҳаракатлари билан яна янги жамоасига фойда келтира олди. Шерали Жўраевнинг кучсиз чиққан зарбасини ўз вақтида тўхтатиб қолиб, дарвозага жойлаб қўйганидан ташқари ҳам Томиванинг фаоллиги майдондагилардан ажралиб турди.

Марказий ҳужумчи: Игорь Сергеев

Сергеев сўнгги 3 турда супер формада ўйнамоқда. Дердийок захирадан тушиб 2 та гол урса ҳам асосий таркибга кира олмаяпти. Чунки ҳозир Игорнинг ўйини ўхшаб турибди. Тиғиз тақвимга қарамай Шотада муаммолар кам. Ҳар бир чизиқда кучли рақобат ва савияли ўйинчилар бор.

Абдулвосид Валихонов тайёрлади