SPORTS.uz талқини бўйича Суперлига 22-тур рамзий терма жамоаси

Дарвозабон: Абдувоҳид Неъматов (“Насаф”)

Қаршиликларнинг “Қўқон-1912”га қарши ўтказган учрашуви ғолибдан қатъи назар жорий мавсум Суперлигани безаб беришга қодир бўлган беллашув бўлди. Айниқса, ушбу беллашувда Мурод Холмуҳаммедовнинг пенальтиси қайтарилиши мисли кўрилмаган воқеа бўлди. 

Ҳали 20 га ҳам тўлмаган Абдувоҳид Неъматовнинг ўша ўйиндаги қаҳрамонликларини фақат бу билан чеклай олмаймиз. 90 дақиқа давомида “аждарлар” дарвозасига уюштирилган кетма-кет ҳужумлар ёш посбон томонидан бирин-кетин қайтарилди. 

Чап қанот ҳимоячиси: Абдуқаҳҳор Ҳожиакбаров (“Сурхон”)

Қанот ҳимоясидаги ўйинлари орқали бизга яхши таниш бўлган Абдуқаҳҳор Ҳожиакбаров “Андижон”га қарши учрашувда ғалаба голи муаллифлик қилди. Ушбу муваффақият воҳаликларнинг хавфли зонадан чиқиб кетиши учунгина эмас, принципиал ва бевосита беллашувда “Андижон”нинг таслим этилишига сабаб бўлди. 

Ҳожиакбаров, аслида, ўнг қанотда ўйнайди. Аммо қанот ҳимоячиларининг ўзаро алмашиб ҳаракат қилишлари жуда кўп учрайди. Шу сабабли, жамоасини аутсайдерлар орасидан олиб чиққан футболчини рамзий жамоамизга киритишга қарор қилдик.

Марказий ҳимоячи: Камолиддин Тожиев (“Металлург”)

“Сўғдиёна”га қарши бевосита поғона учун кечган баҳсда бекободликлар бир киши кам бўлиб ўйинни якунлашга мажбур бўлди. Саламат Қутибоев иккинчи таймнинг сўнгги 15 дақиқасида жамоасини қийин аҳволда қолдириб, майдонни тарк этди. 

Ҳимоя ушбу вазиятгача қандай метинлик намойиш этган бўлса, бундан кейинги дақиқаларда масъулиятни янада чуқурроқ ҳис қилган ҳолда Тожиев бошлиқ мудофаадагилар ажойиб ўйин кўрсатишди. 

Ўнг қанот ҳимоячиси: Ҳожиакбар Алижонов (“Пахтакор”)

“Шерлар” Олмалиқда Суперлиганинг етакчиси ким эканлигини кўрсатиб қўйишга эришди. Жамоа шу қадар шиддатли футбол намойиш этдики, гол бўлгани сари олмалиқликларнинг ўйини орқага кетиб бораверди. Алижоновнинг бир нечта зарбаси дарвозани жиддий хавф остида қолишига сабаб бўлди. Унинг ҳимоядаги ҳаракатлари ҳам таҳсинга сазовор. 

Таянч ярим ҳимоячиси: Шароф Муҳитдинов (“Насаф”)

“Қўқон-1912”га қарши ўйинда “Насаф” марказни тўлиқлигича эгаллади. Бунинг асосий сабабчиси сифатида “аждарлар”нинг асосий стандартчиси ва етакчиси Шароф Муҳитдиновни келтириш мумкин. Яккакурашларга асосланган футболни тарғиб этувчи қўқонликларнинг ўйинини бўғиб қўйишда қаршиликлар ярим ҳимоячисининг хизматлари катта. 

Чап қанот ярим ҳимоячиси: Файзулло Жуманқўзиев (“Бухоро”) 

Аслида, бухороликлар қанот ҳимояси вакили ҳисобланган Жуманқўзиев шу куни ҳимоядан кўра, ҳужумда кўпроқ фаол бўлди. “Пахтакор” стадионида кечган баҳсда “Бунёдкор” ҳимояси анча ожиз ҳаракат қилди. Айниқса, майдон марказида тўпни олдириб қўйиш ва ҳимоя чизиғининг майдон марказига яқин жойлашуви сабаб, Жуманқўзиевнинг тезкор рейдлари анча хавфли кўриниш олди. Ушбу ўйиннинг энг фаол футболчиси ва жамоасининг очко олишига энг катта ҳиссани қўшган Файзуллони рамзий терма жамоамизга киритишга қарор қилдик. 

Ўнг қанот ярим ҳимоячиси: Азиз Турғунбоев (“Навбаҳор”)

“Навбаҳор”нинг ғалабасиз серияларидан сўнг, энди эришилаётган ҳар бир ғалаба янги мураббий ва тизим билан боғланиши табиий. Аммо аввалги 11 ўйиндан иборат ғалабасиз серия давомида ҳам Турғунбоевнинг кўрсатган футболи яхши чиқаётганди. 

“Қизилқум”нинг иккинчи даврадаги ўйинлари бутунлай бошқа даражада. Азизнинг дубли ушбу жамоа устидан ғалабани тақдим этди. 

Ҳужумкор ярим ҳимоячиси: Драган Черан (“Пахтакор”)

Тошкентликларнинг йирик ғалабаси шу қадар ажойиб тарзда қўлга киритилдики, “шерлар”дан кўпроқ футболчини рамзий терма жамоага киритишга мажбур бўлдик. Арвеладзе жамоасида бир футболчининг яққол етакчилигини учратмаймиз. Черан ўша куни зўр ўйнаган жамоанинг бир аъзоси эди. Битта гол ва битта пас амалга оширган сербиялик футболчи жамоасининг йирик ғалабасида катта ўрин тутди. 

Чап қанот ҳужумчиси: Жалолиддин Машарипов (“Пахтакор”)

Тошкентликларнинг яна бир етакчиси шу турда чап қанот вингери позициясида ҳаракат қилган исталган футболчидан фойдалироқ ҳаракат қилди. У киритган гол ва 2 та ассист сўзимиз учун исбот бўлиб хизмат қилади. 

Ўнг қанот ҳужумчиси: Достон Ҳамдамов (“Пахтакор”)

Достон ўзининг бир неча йил аввалги супер зарбаларини ёдга ола бошлади. Олмалиқдаги стадионда унинг ўнг қанотдан уюштирган рейдлари ва кучли зарбалари баҳсни безаб берди. У киритган гол Суперлигада йил голи бўлиш учун даъвогарлик қилади. 

Марказий ҳужумчи: Бобир Абдихолиқов (“Насаф”)

“Қўқон-1912” дарвозасига киритилган навбатдаги голи орқали “Насаф” футболчиси тўпурарлар жадвалида яна бир қадам ташлашга эришди. Катта ўйинларда ҳам мана шундай вазиятлардан максимал фойдалана олган тақдирда, яхши даражадаги етук ҳужумчига айланиши мумкин.

Абдулвосид Валихонов тайёрлади