Сречко Катанец: "Қозоғистонликларга бўш ҳудуд қолдирмадик. Жуда зич жойлашдик..."

Ҳалқаро ўртоқлик ўйини доирасидаги Ўзбекистон - Қозоғистон учрашувида вакилларимиз 2:0 ҳисобида зафар қучди. Беллашувдан сўнг "оқ бўрилар" бош мураббийи Сречко Катанец матбуот анжуманида иштирок этди:

"Тактик ажойиб ғалаба бўлди. Таассуротларим ижобий. Жамоам яхши ҳаракат қилди, борларини бериб ўйнашди. Жисмонан биз янада кучлироқ бўлишимиз мумкин. Келгусида шундай бўлишига ишонаман. 

- Кечаги матбуот анжуманида шогирдларингизни ақлли, тактик футбол кўрсатишга қодир, деб фикр билдиргандингиз. Қозоғистонликлар ҳақида қандай муносабатдасиз?

- Менинг уларга баҳо беришим тўғри бўлмайди. Сабаби, мен ўзимнинг жамоамни кузатдим. Айтиш лозим, улар ажойиб ҳаракат қилишди.

Рақибда икки-учта яхши вазият бўлди. Биринчи таймда жарима зарбаси ҳам хавфли чиқди. Ўша вазиятда омадимиз келди. 

Осиёнинг кўп жамоаларига қарши 3 та марказий ҳимоячи билан ўйнасангиз, улар қийналиб қолишади. Имкониятлар яратишда, ҳужумлар ташкил қилишда улар муаммоларга дуч келади.

Қозоғистонликларга бўш ҳудуд қолдирмадик. Жуда зич жойлашдик ва бу рақибга яхшигина бош оғриқ бўлди. Шунга қарамай, уларни хавфли терма эканини эътироф этишим керак.

 

- Баъзи ўйинчиларимизда эркинлик бор эди. Улар тўп билан бемалол, ортиқча босимсиз ҳаракат қилишди. Бу сизнинг кўрсатмангиз эдими?

- Ҳужумчиларимизга доим эркинлик берамиз. Улар истагандек ҳаракат қилишлари мумкин. Олдинги чизиқ вакиллари ўйин вақти импровизация намойиш этиши мумкин. Лекин ҳимояда барча маъсулият билан ҳаракат қилиши керак. Уларнинг ўз вазифалари бор. 

Ҳимоямиз Элдор Шомуродовдан бошланади. У ҳужумчи сифатида ҳимояланиш тактикамизни бошлаб беради. Шунингдек, қанот ҳимоячиларимиз ҳам ортга қайтиб, муҳим ишни ўз бўйнига олади. 

- Машарипов ва Бозоровнинг йўқлиги асосий таркиб танлашда қанчалик таъсирини ўтказди?

- Бугун ўйнаган футболчиларнинг ўйинидан қониқиш ҳосил қилдим. Мен ўзимда бор материалдан унумли фойдаланишга ҳаракат қиламан. 

Машарипов ва Бозоровнинг қайтиши биз учун албатта, фойдали бўлади. Айниқса, Жалолиддиннинг таркибга қайтиши термамизга ижобий таъсир қилади. Бироқ шуни айтишим керак, йигитларнинг ҳаракати мен учун қониқарли бўлди.

- Шомуродов бугун ўз даражасини кўрсатди. Аммо "Рома"да у захирада қолиб кетмоқда. Сиз Элдорга клубдаги фаолияти борасида қандайдир маслаҳат бердингизми?

- Йўқ, унга ҳеч қандай тавсия бермадим. Мен мураббийман ва ўз ишимни қилишим керак. Элдор профессионал ҳамда яхши классдаги футболчи. У бизнинг энг яхши ўйинчиларимиздан. 

Унга ҳам осон эмас. Чунки Римда асосан захирада қолиб кетмоқда. Мен унинг кўпроқ ўйин амалиётига эга бўлишини истайман. 

 

 

 

Фикрлар

Фикр қолдириш учун авторизациядан ўтинг!