Суперклуб бир уринишда Англия термасининг икки юлдузини олади

“Челси” ёзги трансферлар даврида таркибида жиддий ўзгаришлар қилишга тайёргарлик кўрмоқда. “Аристократлар” Англия терма жамоасининг икки ўйинчиси – Эберичи Эзе ва Марк Гехини нишонга олган.

Айни пайтда бу футболчилар “Кристал Пэлас” шарафини ҳимоя қилмоқда. Лондон суперклуби икки трансферга 130 миллион фунт сарфлашни режалаштиряпти.

Эзе жорий мавсумда 30 та учрашувда 53 та голли вазият яратди, 829 та аниқ пас узатди, тўрт гол ва саккизта ассист муаллифи бўлди. Истеъдодли чарм тўп устаси ҳужумда ҳам, ҳимояда ҳам ишончли ўйнай олади.

Марк Гехи аслида “Челси” тарбияланувчиси ҳисобланади. У “Кристал Пэлас”га кўчиб ўтганидан кейин ўйини очилиб кетди.

“Кристал Пэлас”нинг австриялик бош мураббийи Оливер Гласнер жамоа таркибини қайта шакллантиришга қарор қилган. У клуб раҳбариятидан олтита янги ўйинчи олиб беришни сўради. Бу янгиланишлар фонида мураббий Эзе ва Гехидан воз кечишга тайёр. Уларнинг трансферидан келадиган маблағ “Кристал Пэлас”ни янада курашувчан қиладиган ўйинчилар олишга йўналтирилади.