Суперлига. 23-турдаги баҳсли вазиятлар юзасидан Эксперт-ҳакамлар комиссияси хулосаси

Жорий йилнинг 3 ноябрь санасида Суперлига 2024 йилги мавсумнинг 23-тури якунига етди. Ўзбекистон футбол ҳакамлари маркази мазкур учрашувлар тугагач, Эксперт-ҳакамлар комиссиясининг навбатдаги йиғилишини ўтказди ва тур доирасида кузатилган баҳсли вазиятлар таҳлил қилинди. Бу беллашувларда жами 5 та баҳсли вазият юзага келди. 

Қуйида уларнинг батафсил изоҳи ва чиқарилган якуний қарорлар билан танишишингиз мумкин:

1-вазият. "Пахтакор" - "Андижон" тўқнашуви: мезбонларнинг голи.

"Пахтакор" - "Андижон" учрашувининг 15-дақиқасида мезбонлар ҳисобни очди. Бош ҳакам Никита Мустафин мазкур ҳолатда фол йўқлигини қайд этди ва голни инобатга олди.  

Эксперт-ҳакамлар комиссияси қарори: Мазкур вазиятда тўп ҳужумчининг қўлига эмас, ҳимоячининг тиззасига теккан. Шу сабабли, голни бекор қилиш учун асос йўқ. Эксперт-ҳакамлар комиссияси томонидан ҳакамларнинг қарори тўғри, деб топилди.

Вазият видеоси: https://youtu.be/0h0krfqawqI?list=PL4tHyf5I--nhS8b8MR6g0olVnnwKxl4_N

2-вазият. "Олимпик" - "Навбаҳор" қарама-қаршилиги: баҳсли пенальти.

"Олимпик" - "Навбаҳор" учрашувининг 35-дақиқасида мезбонлар рақиб посбони хатосидан сўнг қулай вазиятга эга бўлди ва шу ҳолатда дарвозабон 10-рақамли футболчига қўполлик ишлатиб, уни тўхтатиб қолди. Бош ҳакам Найим Қосимов мазкур эпизодда фол қайд этиб, нуқтага ишора қилди ва наманганликлар вакилига сариқ карточка кўрсатди.  
 

Эксперт-ҳакамлар комиссияси қарори: Бу вазиятда посбон рақибига нисбатан қўполлик ишлатган. Пенальти белгилаш учун асос етарли. Эксперт-ҳакамлар комиссияси ҳакамларнинг қарори тўғри эканини маълум қилади.

Вазият видеоси: https://youtu.be/tnKHt5SR3jc?list=PL4tHyf5I--nhS8b8MR6g0olVnnwKxl4_N

3-вазият. "Қизилқум" - "Динамо" қарама-қаршилиги: баҳсли қизил карточка.

"Қизилқум" - "Динамо" учрашувининг 68-дақиқасида мезбонларнинг 8-рақамли футболчиси самарқандликларнинг 21-рақамли аъзосига нисбатан қўпол ҳаракат қилди. Бош ҳакам Иброҳим Исмоилов футболчига сариқ карточка кўрсатди. 

Эксперт-ҳакамлар комиссияси қарори: Бу вазиятда ВАР ҳолатга аралашмасдан хато қилган. Футболчи бутсасининг таг қисми билан қасддан рақибига зарба берган. Бу каби ҳолларда қизил карточка кўрсатилиши лозим. Эксперт-ҳакамлар комиссияси ҳакамларнинг қарорини нотўғри, деб ҳисоблади.

Вазият видеоси: https://youtu.be/A6rfniWKLuU?list=PL4tHyf5I--nhS8b8MR6g0olVnnwKxl4_N

4-вазият. "Нефтчи" - "Бунёдкор" қарама-қаршилиги: баҳсли пенальти.

"Нефтчи" - "Бунёдкор" учрашувининг 80-дақиқасида меҳмонлар қулай вазиятга эга бўлди ва шу ҳолатда тўп мезбонларнинг 20-рақамли футболчисига тегиб, ўйинга қайтди. Бош ҳакам Достон Раҳмонов мазкур эпизодда тўп қўлга тегмаганини қайд этди ва баҳсни давом эттирди.  

Эксперт-ҳакамлар комиссияси қарори: Бу вазиятда видеотакрорлардан кўриш мумкинки, тўп футболчининг қўлига эмас, қорин қисмига теккан. Пенальти белгилаш учун асос мавжуд эмас. Эксперт-ҳакамлар комиссияси ҳакамларнинг қарори тўғри эканини маълум қилади.

Вазият видеоси: https://youtu.be/kpQKlFh58U0?list=PL4tHyf5I--nhS8b8MR6g0olVnnwKxl4_N

5-вазият: "Металлург" - ОКМК ўйини: баҳсли 11 метрлик жарима зарбаси.

"Металлург" - ОКМК учрашувининг 90+2-дақиқасида мезбонларнинг 9-рақамли аъзоси жарима зарбасини ижро этди ва зарбадан сўнг тўп олмалиқликларнинг 22-рақамли вакилига тегиб, майдонга қайтди. Бош ҳакам Рустам Лутфуллин қўл билан ўйин йўқлигини ва қоидабузарлик ҳолати қайд этилмаганини маълум қилди. 

Эксперт-ҳакамлар комиссияси қарори: Бу вазиятда ВАР ҳаками ҳолатга аралашиб, хато қилган. Тўп ҳимоячининг қўлига тегмаган. Шу боис, комиссия бош ҳакамнинг қарорини қўллаб-қувватлайди ва уни тўғри, деб топди.

Вазият видеоси: https://youtu.be/5xfXMl-t-fM?list=PL4tHyf5I--nhS8b8MR6g0olVnnwKxl4_N

УзФҲМ матбуот хизмати