Суперлига. ОКМК 6 учрашувдан буён "Нефтчи"ни мағлуб эта олмаяпти (ўзаро статистика билан танишинг)

Суперлиганинг 11-туридан ўрин олган марказий тўқнашув Тошкентда, ОКМК стадионида бўлиб ўтади. 
 
Миржалол Қосимов бошчилигидаги олмалиқликлар ўз майдонида турнир жадвалида етакчилик қилаётган "Нефтчи"ни қабул қилади. Беллашув Тошкент вақти билан 17:00’да старт олади. 
 
ОКМК Суперлига доирасидаги сўнгги 6 та учрашувдан буён фарғоналикларни мағлубиятга учрата олмаяпти — 3 та дуранг, 3 та мағлубият. Клуб сўнгги бор 2022 йили 3:1 ҳисобида "йўлбарслар"ни енгган. Ўша мавсумнинг дастлабки баҳсида ҳам ОКМК худди шу ҳисобда зафар қучган.

ОКМК – "Нефтчи": Статистикада устунлик фақат бир томонда:

Икки клуб шу вақтгача 32 марта тўқнаш келган бўлиб, ғалабалар борасида "Нефтчи" устунликка эга — 15 та ғалаба. ОКМК эса рақибини 8 бор мағлуб этган. Яна 9 та ўйинда дуранг натижа қайд этилган.

Голлар нисбатида ҳам фарғоналиклар олдинда — 54:41. Энг йирик ғалабаларга келсак, ОКМК 3:0 ҳисобида, "Нефтчи" эса 4:0 натижа билан энг катта ютуқларини қайд этган.

Маълумот ўрнида, ОКМК онлайн турнир жадвалида 15 очко билан 6-ўринда бормоқда. "Нефтчи" эса 27 очко жамғарган ҳолда, якка пешқадамликни қўлга олган. 

Шунингдек, Қосимов жамоаси чемпионат доирасида 5 учрашувдан буён мағлубиятга учрамай келмоқда. Жамоа сўнгги бор сафарда "Пахтакор"га 3:1 ҳисобида имкониятни бой берган эди. Бундан кейин эса "Андижон"ни, "Бухоро"ни ҳамда "Локомотив"ни ютди. "Динамо" ва Сурхон билан эса дуранг ўйнади. 

Исломбек Исмоилов жамоаси эса сўнгги бор ўз майдонида Камолиддин Тожиевнинг "Пахтакор"ига имкониятни бой берган (1:0). Ундан сўнг "Бунёдкор", "Насаф", "Хоразм" ва "Қўқон-1912" жамоалари устидан кетма-кет 4 ғалабани тантана қилди.