Суперлига қуръаси GotSport компанияси билан ҳамкорликда ўтказилади

Лига мусобақаларга қуръа ташлашда узоқ йиллар давомида Бергер тизимига асосланган классик услубдан фойдаланиб келди. Бироқ бугунги кунда жаҳоннинг етакчи лигалари тақвимдаги қийинчиликлар, логистика муаммолари ва жамоаларнинг халқаро мусобақаларини инобатга олган ҳолда, сунъий идрокка асосланган янги методлардан фойдаланишга ўтган.  

Ўзбекистон миллий жамоаси Жаҳон кубогида иштирок этишидан келиб чиқиб, 2026 йил футболимиз учун тарихий аҳамият касб этади. 2027 йилнинг дастлабки кунлариданоқ эса Саудия Арабистонида Осиё Кубоги старт олади. Ярим йил ичидаги икки йирик мусобақа Суперлига тақвимини шакллантиришда қатор қийинчиликларни келтириб чиқаради.  

Лига ўтган мавсум янги қуръа механизмлари бўйича халқаро тажрибани таҳлил қилди ва GotSport компанияси билан шартнома имзолашга қарор қилди. Мазкур компания хизматларидан ғарбнинг футболи ривожланган мамлакатлари қаторида Жанубий Корея К лигаси, Австралия А лигаси кабилар ҳам фойдаланмоқда.  

Лига 2026 йилнинг биринчи ярмини бошқа майдонларда бошлашни режалаштирган клублар ҳақида эълон қилганди. Шунингдек, янги тақвим режани ишлаб чиқишда халқаро майдонда Ўзбекистон номидан иштирок этувчи клублар имкониятлари ҳам инобатга олиниши режалаштирилган. Бундан ташқари, дербилар, ўтган мавсумни кучли тўртликда якунлаган клубларга қарши учрашувларнинг кетма-кет турларга тўғри келиб қолмаслиги масаласига устуворлик берилади.  

Айни пайтда Лига ГотСпорт мутахассислари билан ҳамкорликда янги мавсум тақвим режасининг бир неча ўнлаб версияларини муҳокама қилмоқда. Тез орада ишчи гуруҳ саралаб олган тақвим лойиҳалари клубларга тақдим этилади ва улар афзал билган вариантлардан қай бири асосида мусобақа ўтказиш масаласи келишилинади.  

Янги ҳамкорлик Суперлиганинг янада рақобатбардош ва томошабоп мусобақа бўлишига ҳисса қўшишига ишонамиз.

Бу ҳақда UzPFL хабар берди.