Суперлига трансферлари: "Сўғдиёна"ни 6 нафар, "Қизилқум"ни эса бир футболчи тарк этди

Суперлига баҳслари Жаҳон чемпионати сабаб юзага келган танаффусдан сўнг қайта бошланиш арафасида. Жамоалар янги босқичга тайёргарлик кўрар экан, таркибларда ҳам ўзгаришлар кузатилмоқда.

Жумладан, Суҳроб Иззатов, Файсал Мулич, Никола Миркович, Александар Болевич, Умидбек Султонов, Тоҳирбек Тўхтасинов "Сўғдиёна" клуби билан тузилган меҳнат шартномасини бекор қилди. Шунингдек, Олексий Шебетун "Қизилқум" клуби билан ҳам хайрлашди.

Аввалроқ SPORTS.uz сайти "Сўғдиёна" "Каттақўрғон"да ҳаракат қилган Беҳруз Асқаров ва "Андижон"дан кетган Жамшид Болтабоевни ўз сафига қўшиб олганини маълум қилган эди. Клуб ҳали расмий хабар бермаган, бироқ футболчилар ёзги йиғинни "бўрилар" сафида ўтказмоқда.

Маълумот учун, Суперлига баҳслари 16 июль куни қайта старт олади.