Суперлигада 15-турнинг энг зўрлари кимлар?

4-6 август кунларида Суперлиганинг 15-тур баҳслари ўтказилди. Кутилганидек, ўйинларнинг шиддати ҳамда муросасизлиги барчага ёқиб тушяпти.

Мухлис ва мутахассислар томонидан ҳар бир ўйин алоҳида эътирофга сазовор бўлаётгани ҳам эътиборга молик. Ҳар бир учрашувнинг ўз қаҳрамони бўлади ва ана шу якунда энг яхши футболчига айланади. Қуйида шу хусусида сўз юритамиз.

“Андижон” – “Сурхон” – 0:0. Учрашувнинг энг яхши футболчиси – Артём Потапов

“Бобур Арена”да яна ўзгача муҳит ҳукм сурди. Бундай юқори атмосферага фақат гол етишмади. Бунга дарвозабонлар ва айниқса, “Сурхон”нинг россиялик посбони Артём Потапов сабабчи. Боиси, легионер посбон жамоа сардори сифатида ўйинни жуда яхши ўтказди ва қатор вазиятлардан “Сурхон”ни голлардан қутқариб қолди. Унинг ишончли ўйини майдонда бир киши кам бўлиб қолган жамоадошларига руҳий далда бағишлаб турди.

“Металлург” – “Навбаҳор” – 1:1. Учрашувнинг энг яхши футболчиси – Забиҳилло Ўринбоев

Чемпионлик учун курашаётган “Навбаҳор” бу турда қимматли икки очкони йўқотди. Ғалабага жуда яқин келган наманганликлар қўшимча дақиқаларнинг охирида ғалабани қўлдан чиқариб юбордилар. Аниқроғи, “Металлург” сардори ва етакчиси Забиҳилло Ўринбоев “Навбаҳор”ни ғалабадан маҳрум қилди. Бутун учрашувни фаол ўтказган ҳужумчи охирида гол уриб мезбонларнинг қаҳрамонига айланди. Натижада Ўринбоев чемпионатдаги 4-голи муаллифига айланди. Қизиғи, Забиҳилло гол урган учрашувларда бекободликлар ютқазмаяпти.

“Турон” – “Насаф” – 1:0. Учрашувнинг энг яхши футболчиси – Шоҳмалик Комилов

Турнинг кутилмаган натижаси Яйпанда кузатилди. Таркибини ёшартириб юборган “Турон” жамоаси чемпионлик учун курашаётган “Насаф”ни қабул қилди ва Ҳумоюн Муртазоевнинг ягона голи эвазига қимматли уч очкони қўлга киритди. Учрашувнинг энг яхши футболчиси сифатида ярим ҳимоячи Шоҳмалик Комилов қайд этилди. “Насаф”дан ижарага олинган ярим ҳимоячи собиқ клубига қарши ўзининг энг яхши ўйинларидан бирини намойиш қилди ва ҳақли тарзда беллашувнинг энг яхши футболчисига айланди. Комилов “Турон”нинг ўйинида катта ҳажмдаги ишни бажарди. Қизиғи, ўтган турда “Бухоро”га қарши учрашувда ҳам Шоҳмалик ўйиннинг энг яхши футболчисига айланганди. Бу сафар ҳам Комилов яна энг зўри деб топилди.

“Пахтакор” – “Нефтчи” – 0:1. Учрашувнинг энг яхши футболчиси – Умар Адҳамзода

“Ўзбек классико”сида “Нефтчи” Тошкентда “Пахтакор”ни 0:1 ҳисобида мағлубиятга учратиб қайтганидан хабардорсиз. Ўтган турда фарғоналикларнинг энг яхши футболчиси деб топилган Умар Адҳамзода бу сафар ҳам яна энг зўри сифатида қайд этилди. Ҳа, чиндан ҳам иқтидор эгаси аллақачон “Нефтчи”нинг муҳим фигураларидан бирига айланиб улгурган. “Пахтакор”га қарши учрашувда у яна бир бор ўзининг нималарга қодирлигини кўрсатди ҳамда чемпион жамоага жиддий муаммолар туғдирди.

“Бухоро” – “Қизилқум” – 1:0. Учрашувнинг энг яхши футболчиси – Дилшод Жўраев

Ниҳоят, “Бухоро” клуби ғалабасиз сериясига нуқта қўйди. Ўз уйида “Қизилқум”ни қабул қилган бухороликлар Дилшод Жўраевнинг биринчи бўлимда урган ягона голи эвазига муҳим уч очкони нақд қилдилар. Табиийки, якунда Жўраев беллашувнинг энг яхши футболчисига ҳам айланди. Шундоқ ҳам Дилшод сўнгги пайтларда “Бухоро”нинг етакчиси сифатида ажралиб турганди.

“Бунёдкор” – ОКМК – 1:1. Учрашувнинг энг яхши футболчиси – Сиявуш Ҳақназари

Тошкент дербисида “Бунёдкор” мағлубиятдан аранг қутулиб қолди. ОКМК эса тайёр ғалабани қўлдан чиқариб юборди. Олмалиқликларнинг голида эронлик Сиявуш Ҳақназари асосий ишни бажарди. Рақибнинг хатосидан кейин у жарима майдони ичига ёриб кириб чиройли гол муаллифига айланди. Голдан ташқари ҳам бу легионер ўзининг фойдали иш коэффициенти орқали ажралиб турди.

“Олимпик” – “Сўғдиёна” – 3:3. Учрашувнинг энг яхши футболчиси – Жавоҳир Қаҳрамонов.

“Сўғдиёна”нинг ўтган турда сафарда “Бунёдкор”га қарши (0:2) ғалабали ўйинида битта гол урган ва битта ассист қайд этган Жавоҳир Қаҳрамонов энг яхши футболчига айланганди. Бу сафар ҳам у яна бир бор учрашувнинг энг зўрига айланди. “Олимпик”га қарши 3:3 ҳисобидаги жанговар учрашувда Қаҳрамонов пенальти орқали голлар шоусини бошлаб берди. Жиззахликлар учун Қаҳрамоновни жамоада сақлаб қолингани қанчалик фойдали бўлаётганини кўриб турибсиз.

Шуҳратбек Жўраев.