Суперлигада турнинг энг яхшилари кимлар?

Суперлиганинг 9-тури ҳам поёнига етди. Одатга кўра, ушбу турдаги 7 та ўйинда ўзини кўрсатган ҳамда энг яхши футболчи бўлганларга алоҳида тўхталиб ўтамиз.

“Металлург” – “Навбаҳор” – 1:1. Энг яхши футболчи: Йован Жокич

Сербиялик легионер Жокич “Навбаҳор”нинг муҳим фигураларидан бири, бунга шубҳа йўқ. Олмалиқда “Металлург” билан бўлиб ўтган учрашувда ҳам Йован рақибларига катта муаммолар туғдирди. Ўйинни тўлиқ ўтказди ва ўз позициясида ҳукмронлигини намойиш қилди. Рақиб ҳужумини бузишда ҳамда жамоасининг ҳужумларини бошлашда, шунингдек, шерикларига биринчи пасни узатишда Жокичга қойил қолса бўлади.

“Олимпик” – “Андижон” – 0:0. Энг яхши футболчи: Иброҳим Ибрагимов

Тошкентда ўтган “Олимпик” – “Андижон” қарама-қаршилигида дарвозалар дахлсиз қолди. Ўзбекистон олимпия терма жамоаси аъзоси, “Олимпик” шарафини ҳимоя қилаётган Иброҳим Ибрагимов беллашувнинг энг яхши ўйинчиси номига лойиқ кўрилди. Иқтидорли ярим ҳимоячи ўз истеъдодини намойиш этган ҳолда мухлис ва мутахассисларда яхши таассурот қолдирди.

“Пахтакор” – “Қизилқум” – 1:1. Энг яхши футболчи: Диёр Холматов

Акмал Холматовнинг ўғли Диёр Холматов “Пахтакор”да ўз ўрнини топиб бормоқда. “Қизилқум” билан учрашувда кичик Холматов яхши таассурот қолдирди. Фақат жамоаси ғалаба қозона олмади. Бунга иккинчи бўлимда бир футболчи кам бўлиб қолгани ҳам сабаб, албатта. Шунга қарамай, Диёр Холматов учрашувнинг энг зўри бўлди.

“Насаф” – “Динамо” – 1:1. Энг яхши футболчи: Абдувоҳид Неъматов

Қаршидаги учрашувда “Насаф” дарвозабони Абдувоҳид Неъматов алоҳида эътирофга муносиб. У жамоасини муқаррар голлардан сақлади. Аслида унинг жамоасида ғалаба учун имконият кўпроқ эди. Аммо “Динамо” “Насаф”га жиддий қаршилик кўрсатди. Қолаверса, баҳс бошларида мезбонлар майдонда бир футболчи кам бўлиб қолишди. Шу боис қаршиликларга янада оғир бўлди. Неъматов эса дарвозабон ярим жамоа иборасини амалда исботлади.

“Нефтчи” – ОКМК – 1:0. Энг яхши футболчи: Жасур Жалолиддинов

Фарғонада бўлиб ўтган ушбу баҳсда ҳаммасини ягона гол ҳал қилди. “Нефтчи” футболчиси Жасур Жалолиддинов жарима зарбасидан қойилмақом гол урди. Бу худди Миржалол Қосимовнинг футболчилик пайтидаги стандартдан урадиган голларига ўхшаб кетди. Шу куни ОКМК ўйинчиларига Жасурни тўхтатиб қолиш қийинчилик туғдиргани рост. Гарчи у пенальтидан гол ура олмаган бўлса-да, айбини жаримадан киритган голи билан ювиб кетди.

“Сўғдиёна” – “Бунёдкор” – 4:0. Энг яхши футболчи: Люпчо Дориев

Македониялик легионер Люпчо Дориев “Сўғдиёна”нинг чинакам топилма футболчиларидан бирига айланди. “Бунёдкор”га қарши баҳсда у хет-трикка эришди ва барчанинг олқишларига сазовор бўлди. Дориев эндиликда 8 та гол билан Суперлигада Табатадзе билан тўпурар бўлиб турибди. Люпчога қизиқиш ортиб кетди.

“Локомотив” – “Сурхон” – 1:1. Энг яхши футболчи: Санжар Турсунов

Муваффақиятсиз ўйинлар ўтказаётган “Локомотив” бу турда ҳам ғалаба қозона олмади. Ўз уйида “Сурхон” билан бўлиб ўтган баҳсда мезбонлар фақат мағлубиятдан қутулиб қолдилар. “Локомотив” сардори, етакчиси ва фахрийси Санжар Турсунов жамоани майдонда бошқаряпти. У “Сурхон”га қарши ўйинда ҳам жамоадошларига ўрнак бўлди. Ҳар бир ҳужумда ўзи иштирок этди. Рақибга жиддий муаммолар туғдирди. Лекин унинг бир ўзига осон эмас. Агар “Локо”да Турсуновга ўхшаган яна 2-3 та футболчи бўлганида жамоа ҳозир юқори поғоналардан бирини эгаллаб турган бўларди.

Шуҳратбек Жўраев.