"Сурхон" - "Андижон" ўйинида нималар рўй берди?

Суперлиганинг 2-турида “Андижон” Тошкентда “Пахтакор” марказий стадионида “Сурхон”га қарши майдонга тушди.

Аввало шуни таъкидлаш жоизки, беллашувдан олдин “Андижон” жамоаси билан ҳамкорлик шартномасини имзолаган Туркиянинг “Антальяспор” клуби делегацияси муносиб кутиб олдинди ва уларга “Андижон” клуби бош директори Улуғбек Мирзаев томонидан жамоа либослари эсдалик совғаси сифатида топширилди. Шунингдек, “Антальяспор” клубининг халқаро муносабатлар ва стратегик режалаштириш бўйича менежери, делегация раҳбари Эрдем Эрдалга зарбоф тўн кийдирилди. Ўз навбатида жаноб Эрдал Улуғбек Мирзаевга ҳам “Антальяспор” клуби либосини ва махсус совғасини топширди.

Бевосита учрашувга тўхталсак, “Андижон” учун аламли якун топди. Боиси, баҳс тақдирини ягона гол ҳал қилди. Аммо учрашув давомида баҳс-мунозараларга сабаб бўладиган воқеликлар кузатилди. Тўғри, танаффусгача “Андижон”нинг ўйини кўнгилдагидек чиқишида нимадир етишмагандек бўлди.

Иккинчи бўлимда эса Хомяков жамоаси ўйиндаги вазиятни ўзгартира олди. Бироқ беллашув давомидаги кутилмаган ҳолатлар “Андижон” мураббийларининг режаларини ўзгартирди. 53-дақиқада Леван Арвеладзе кутилмаганда тўпни олдириб қўйди ва сўнг хатосини тўғрилаш учун рақибини тўхтатди. Бу ҳолатда бош ҳакам футболчига қизил карточка кўрсатишни лозим топди. “Бургутлар” майдонда бир киши бўлиб қолишларига қарамай, матонат ва жасорат кўрсатдилар. Бирин-кетин рақиб дарвозаси олдида хавфли вазиятларни юзага келтира бошладилар. Мураббийлар томонидан қилинган ўзгаришлар ҳам фойда бераётганди. Натижада бурчакдан узатилган тўпдан сўнг “Андижон” сардори Илдар Маматказин боши билан рақиб дарвозасини ишғол қилди. Лекин VARдаги ҳакамлар ва бош ҳакам мазкур голни ҳисобга олмади. Ушбу ҳолатни текшириш учун анчагина вақт сарфланди. Бироқ нима учундир Маматказиннинг голи бекор қилинди ва бу ҳолат табиийки, Андижондан келган мухлисларнинг кескин эътирозларига сабаб бўлди. Айтишларича, у ерда Бекмуродов офсайдда қолган деган хулосага келинган. Бироқ такрорий вазият кўрилганида бу жуда баҳсли вазият экани намоён бўлди.

“Андижон” камчилик бўлиб қолишига қарамай, яна ҳужумлар уюштиришга ҳаракат қилди. Бироқ “Сурхон”га барибир сон жиҳатидан устунлик фойда берди ва 81-дақиқада бурчакдан узатилган тўпни Ҳамиджонов голга айлантирди.

Ўйин охирларида бош ҳакам “Андижон”нинг яна бир легионери – Рубин Хебайни ҳам майдондан четлатиб юборди. Тўп учун курашда рақибини йиқитди дея аввалига сариқ карточка кўрсатди. Сўнг кўп ўтмасдан қизил карточкани чўнтагидан чиқарди. Ўша вазиятда Хебайдан ҳакамга нима дегани ҳақида сўраганимизда у шунчаки албан тилида гапирганини, ҳақоратли сўз ишлатмаганини айтди. Маълумот учун, Рубин асосан албан ва инглиз тилларида гаплашади. Бош ҳакам эса тушунарсиз ҳолатда “Андижон” ҳужумчисига қизил карточка кўрсатиб, яна бир бор андижонликларнинг кескин эътирозига сабаб бўлди. Афсуски, ўйин давомидаги асосий қаҳрамонлар ҳакамлар бўлиб қолди. Балки ЎзФҲМ (Ўзбекистон футбол ҳакамлари маркази) ушбу ўйиндаги баҳсли ҳолатларни кўриб чиқар...

Учрашув қайдномаси

 “Сурхон” – “Андижон” - 1:0 (0:0)

11 март. Тошкент. “Пахтакор” марказий стадиони. 776 томошабин.

Ҳакамлар: Раҳим Каримов, Маҳмуд Турдиев, Феруз Достонов.

VAR ҳаками: Азиз Асимов.

AVAR ҳаками: Алишер Усмонов.

Назоратчи: Бобур Ҳайдаров.

Комиссар: Жамшид Имомов.

“Сурхон”: Артём Потапов, Бобур Асқаров, Суннатилла Ҳамиджонов, Достон Турсунов (Камрон Саидазимов, 90+6), Ҳумоюн Шербўтаев, Тамирлан Жамалутдинов (Асад Каримов, 65), Силванус Нимели, Нуриддин Ҳасанов, Нодир Бобомуродов (Диёр Рамазонов, 90+1), Шохжаҳон Султонмуродов, Бехруз Шайдулов.

“Андижон”: Игорь Литовка, Дилшод Комилов, Илдар Маматказин, Абдувоҳид Ғуломов, Ахтам Назаров (Сардор Абдунабиев, 87), Муҳаммадкарим Тоиров, Леван Арвеладзе, Нодари Кавтарадзе (Рубин Хебай, 58), Фарҳод Соҳибжонов (Илҳом Алижонов, 87), Суҳроб Бердиев (Шаҳбоз Эркинов, 90+4), Бобур Фарҳодов (Фарҳод Бекмуродов, 58).

Гол: Суннатилла Ҳамиджонов, 81 – 1:0.

Огоҳлантиришлар: Ҳумоюн Шербўтаев, 60 – Муҳаммадкарим Тоиров, 53. Игорь Литовка, 80.Рубин Хебай, 90+9. Шаҳбоз Эркинов, 90+9.

Четлатишлар: Леван Арвеладзе, 53. Рубин Хебай, 90+9.