Тчуамени узоқ вақт сабр қилган: Вальверде билан жанжалнинг янги тафсилотлари очиқланди

Журналист Хавьер Санчес "Реал" футболчилари Федерико Вальверде ва Орельен Тчуамени ўртасидаги можаро ҳақида янги маълумотларни ошкор қилди.

Манбага кўра, Тчуамени узоқ вақт давомида Вальверденинг машғулотлардаги провокацияларига сабр қилиб келган. Кечаги машғулотдаги қаттиқ тўқнашувдан кейин вазият кескинлашган. Айрим гувоҳлар ушбу эпизодни жуда хавфли деб баҳолаган, чунки тўп майдоннинг бошқа қисмида бўлганига қарамай, Тчуамени жиддий жароҳат олишдан аранг қутулиб қолган.

Машғулотдан кейин франциялик ярим ҳимоячи Вальверде билан ёлғиз гаплашиш учун тахминан ярим соат кийиниш хонасида кутган. Қизиғи шундаки, Тчуамени испан тилини яхши билса-да, Вальверде билан инглиз тилида мулоқот қилган. Кескин вазият сабаб уругвайлик футболчи унинг гапларини дарҳол тушунмаган.

Кийиниш хонасидаги жанжалга Браим Диас, Фран Гарсия ва Эдер Милитао гувоҳ бўлган.

Хабар қилинишича, жамоадаги кўпчилик футболчилар можарони Вальверде бошлаб берган деб ҳисобламоқда. Бироқ Тчуаменининг кескин жавоби ҳам оқланмаяпти, чунки айнан шу ҳолатдан кейин Вальверде жароҳат олган.
Жанжал якунида Вальверде ерга йиқилиб, бош қисмида ёрилиш пайдо бўлган. Шунингдек, Тчуаменининг шундай ҳиссий вазиятда инглиз тилига ўтгани ҳам атрофдагиларни ҳайратда қолдирган.