Темурхўжа Абдуҳолиқов: "Локомотив"ни ярим йўлда ташлаб кетсам, номардлик бўлади!

“Локомотив”нинг бошида қора булутлар сузмоқда, десак тўғрироқ бўлади. Айниқса, охирги иккита ўйиндаги ўта йирик ҳисобларда мағлубиятга учрагани “Локо”дек клубга сира ярашмайди.

Айни пайтда жамоа сардори сифатида тўп сураётган Темурхўжа Абдуҳолиқов эса клубнинг бундай ҳолатга тушиб қолишига нима сабаб бўлгани, мураббий ўзгариши, “Локо”даги тақдири ва яна бошқа масалалар бўйича sports.uz мухбири билан суҳбатда бўлди.

-  Темурхўжа, “Локомотив” нима учун муваффақиятсизлик гирдобига тушиб қолди?

-  Ҳозир ўзимизда ҳам кайфият яхши эмас. Ҳеч ким бундай бўлишини ўйламаганди. Лекин бу каби омадсизликлар ҳар бир жамоада учраб туради. “Челси”, “Реал”, “Барселона” сингари топ-клубларда ҳам шунга ўхшаш вазиятлар бўлган. Биз эса қўлни туширмасдан ишлашда, меҳнат қилишда давом этишимиз керак. Худо хоҳласа, чуқурликдан чиқиб кетамиз деб умид қиламан. Ҳар учрашувдан олдин жамоамизда микрожароҳатлар ёки кичкинагина бўлса ҳам форс-мажор ҳолатлари бўлиб турибди. Шулар ҳам таъсирини кўрсатяпти. Қайсидир ўйиндан аввал иккита асосий футболчимиз жароҳат олиб майдонга туша олишмади. Оқибатда бутун кўрилган тайёргарлик ва режаларимиз барбод бўлди. Негадир ҳар учрашувда жамоамизга қарши ҳолатлар учрамоқда. Нима ҳам дердик, бу йил “Локомотив” учун омадсиз бўлиб қолди.

-  Яқинда Андрей Фёдоров бош мураббийликдан истеъфога чиқарилди. Сизнингча, уни эртароқ бўшатиш керакмиди ёки аксинча, имконият бериш зарурмиди?

-  Бу ҳақида фикр айтишим қийин. Раҳбариятнинг ўрнида ҳеч қачон бўлиб кўрмаганман. Масалан, кимдир футболчининг ўрнида бўлиб, фикр билдирса ёқмайди. Ёки сиз журналистсиз ва сизнинг соҳангиз бўйича фикр билдирсам ёқмаслиги мумкин. Чунки ўзингиз ишингизнинг паст-баландини яхши биласиз. Шу сабабли раҳбариятнинг ўрнида нимадир дея олмайман. Футбол ўйнаш бошқа, жамоани бошқариш бошқа. Лекин битта нарсани айтмоқчиман, ўша мураббий бизни деб кетиб қолганига шахсан ўзимни айбдордек ҳис қиляпман. Ютқазсак у қайси мураббий бўлсин, истеъфога чиқарилиши мумкин, аммо ҳеч қачон бутун жамоани ишдан бўшатишмайди. Тўғри, кимдир мени захирага ўтказиб қўйгани учун унинг кетгани яхши бўлди, деган фикрларни билдириши мумкин. Лекин бундай муносабат билдириш нотўғри. Майдонда мураббий бурилиши ясаши қийин, ҳар холда ўйин пайтида футболчиларни бошқариш осон кечмайди. Мураббий бизни деб ишдан кетганига виждонимиз қийналади.

-  Мавсум бошида ва ярмида “Локо”ни бир қатор етакчи ўйинчилар тарк этишди. Айнан уларнинг фонида сизни ҳам клубдан кетишингиз ҳақидаги гап-сўзлар тарқалганди...

-  Яширмайман, ҳозирги пайтда менга Суперлига клубларидан яхшигина таклифлар бор. Агар шу пайтда “Локомотив”дан кетиб қолсам бу одамгарчилик томонидан ҳам тўғри келмайди. Ҳа, балки молиявий томондан яхши шароитга эга бўларман ва муносиб даражада шаклланган клубга кетарман. Аммо боя айтганимдек, шундай йўл тутсам, инсонгарчилик юзасидан ҳам тўғри иш қилмаган бўламан. Энг осони клубини қийин вазиятда ташлаб кетиш. Якуни нима бўлишидан қатъи назар бошлаган ишимизни охиригача етказиб қўйишимиз керак.

-  “Локомотив”нинг ўйинларини кўрар эканмиз, жамоада ғолибона характер йўқ. Бундан ташқари, футболчиларда хоҳишнинг камлиги ҳам кўриниб қоляпти. Бунга нима дея оласиз?

-  Янглишмасам, “Локомотив” анча йиллардан бери совриндорлар қаторидан пастга тушмади. Шуни унутмаслигимиз керакки, ҳамма жамоада ҳам пасайишлар бўлади. Европанинг гранд жамоалари ҳам ўз вақтида пастки ўринларда юришган. “Барселона” сингари топ-клубда ҳам пасайиш бўлган пайтда “Локомотив”да бўлмайдими? Ўз меҳнатимиз билан яна олдинги мавқеимизга қайтишимиз мумкин.

-  Айтмоқчисизки, жамоада иштиёқ бор, шундайми?

-  Тўғри, охирги ўйинлардан кейин иштиёқ ва ўзига бўлган ишонч йўқолиб қолган бўлади. Лекин энди биринчи даврадан кейин ҳаммасини ўйлаб, таҳлил қилишга бироз вақт бўлади.

-  “Пахтакор” ва “Насаф”га қарши учрашувлардан кейин жамоа устози Дилшод Нуралиев таркибнинг 70-80 фоизини алмаштириш керак, деган фикрни билдирди. Бунга муносабатингиз қандай?

-  70-80 фоиз? Ҳамманинг ўз фикри бор. Эртага бошқа мураббий келиб шу футболчилар билан ғалабаларга эришиши ҳам мумкин, ҳаммаси натижага боғлиқ. Агар биз биринчи ўринда кетаётганимизда булар Ўзбекистоннинг энг яхши ўйинчилари дейишарди. Аммо ютқазяпмизми, демак ҳаммани алмаштириб юбориш керак, кўряпсизми, барчаси натижа билан боғлиқ. Менимча, таркибда жиддий ўзгаришлар қилишга вақт кам. Дилшод ака Нуралиев иккинчи даврада шу таркиб билан натижа кўрсата олса, нима дейди биласизми? Футболчиларим билан фахрланаман, муҳими натижа кўрсатяпмиз дейди. Ҳаммаси натижага қараб ўзгаради. Тўғри, биз ўзимизни оқламоқчи эмасмиз. Майдонда мураббийнинг берган кўрсатмаларини бажара олмадик. Ахир шунча гол ўтказиб юбордик ва мураббийни ҳам тўғри тушуниб турибман. Лекин эртага ғалабалар бошланадиган бўлса, фикрлари ўзгаради.

-  “Локомотив”ни қутқариш учун қандай мураббий керак, деб ўйлайсиз?

-  Натижа қиладиган мураббий керак. Балки Дилшод ака Нуралиевнинг ўзи ишласин ёки бошқаси келсин, муҳими натижа кўрсатсак бўлди. Энг асосийси, ўйинчиларни руҳлантирадиган, ғолибона руҳни сингдирадиган ва ўзига бўлган ишончни қайта оладиган мураббий керак, бизга.

-  Одатда совринли ўринлар учун курашадиган “Локомотив”ни кўрардик. Аммо бу йил вазият ўзгарди ва энди иккинчи даврада қандай мақсад учун курашасизлар?

-  Биринчи навбатда чуқурликдан чиқиб, тезроқ ғалабалар қозонишни бошлашимиз керак. Етакчилар кетгани ва пандемия бизнинг зараримизга ишлаяпти. Аммо пандемия қайсидир клубларнинг фойдасига ҳам ишлади. Ҳаммага ҳар хил таъсир қилди. Барча бир хил вазиятда дейишди, аммо бундай эмас. Жамоаларнинг муаммолари турлича. Масалан, “Андижон”да молиявий муаммо бор, бошқасида эса яна бошқа муаммо. Лекин ҳар доим ҳам чемпион бўлавермайсиз. Ҳаммаси яхши бўлишини Худодан сўраймиз.

-  Гарчи “Локо” муваффақиятсизликка тушиб қолган бўлса-да, ўйинларингиз миллий терма жамоамиз мураббийларининг эътиборидан четда қолмади ва сизни навбатдаги йиғинга чақиришди...

-  Ҳозирча миллий терма жамоанинг кенгайтирилган таркиби эълон қилинди, шекилли. Балки ўйинларим мураббийларга тўғри келар. Лекин асосийси, расмий ўйинларда билинади. Катта учрашувларда ким ўзини кўрсатса, ўшалар ўйнашади. Сиз Ўзбекистон чемпионатида энг яхши ўйинчидирсиз, тўпурардирсиз ёки чемпиондирсиз, аммо миллий термада энг муҳим паллада ҳеч нарса қила олмасангиз бари бефойда деб ўйлайман. Ҳозиргача терма жамоамизнинг ҳал қилувчи ўйинларида ҳеч ким олиб чиқиб кетмади. Агар шундай бўлганида биз жаҳон чемпионатига чиққан бўлардик.

-  “Локомотив”нинг ҳозирги ҳолатидан хавотирга тушган мухлисларига нима деган бўлардингиз?

-  Энг катта мухлисларимиз – ўзимизнинг яқинларимиз. Улар биз ҳақимизда қайғуришяпти ва раҳмат айтаман. Жамоамизнинг оз бўлса ҳам ишқибозлари бор, йўқ эмас. Уларнинг қўллаб-қувватлаши бизга ёрдам беради. Руҳан тушкунликка тушиб қолган футболчига янада танқидлар қилиб, салбий фикрлар билдирса, ёмонлашиб бораверади ва унинг ўрнидан туриши қийин бўлади. Шу боис қўллаб-қувватласа оёққа туриши ҳам тезлашади.