Тер Штеген Осиё сафарига бормасдан операция қилдириши мумкин

"Барселона" дарвозабони Марк-Андре тер Штеген жамоанинг Японияга бўладиган сафарини ўтказиб юборади. Каталонияликлар 18 июль, пайшанба куни Японияга учиб кетади ва 27 июль куни "Виссел Кобе"га қарши ўртоқлик учрашувида майдонга тушади.

"Mundo Deportivo" нашрининг ёзишича, 33 ёшли немис посбони Осиёга бормайди. У келаси ҳафтада бел оғриқлари туфайли операцияга рози бўлиш ёки йўқлигини ҳал қилади. Агар у жарроҳлик амалиётига рози бўлса, тикланиш жараёни 4 ойгача чўзилиши мумкин.

Агар операция амалга ошса, "Барселона" тер Штегеннинг маоши тўлаб бериладиган лимитидаги 80 фоиздан фойдаланиб, бошқа футболчини, хусусан, ёш посбон Хуан Гарсияни рўйхатдан ўтказиши мумкин бўлади.