Тезкор: Таниқли легионеримиз жамоасини тарк этди!

18 июнь, 14:33
0
Футбол

Фаолиятининг деярли тўлиқ қисмини Россия чемпионатларида ўтказиб келган моҳир ярим ҳимоячиси Вагиз Галиулин янги жамоа излайдиган бўлди.

Кейинги йилларда Россия биринчи лигасида “Нефтехимик” жамоасига сардорлик қилиб келган 36 ёшли плеймейкер клубдан кетгани ҳақида расмий хабар тарқатилди.

Унга кўра, нижнекамнескликлар амалдаги шартномаси ниҳоясига етган ҳимоячилар Павел Котов, Алексей Бердников, ярим ҳимоячилар Денис Талалай, Вагиз Галиулин, Роман Денисов ҳамда ҳужумчи Константин Базелюк билан хайрлашгани ҳақида клубнинг расмий сайтида эълон берди.

Вагиз Галиулин якунланган мавсумда 34 та учрашувдан 22 тасида майдонга тушди. Ҳамюртимиз “Кубань”га қарши ўйинда рақиб дарвозасини ишғол қилиб, жамоасини мағлубиятдан қутқариб қолди. Шунингдек, чемпионат давомида битта ассистни ҳам қайд этди.

Фаолиятининг дастлабки йилларида “Андижон” ва “Бухоро” клубларида ўйнаган Вагиз Галиулин юртимизда узоқ қолмади.

Тажрибали легионеримиз 2006 йилнинг январидан бери Россияда ўйнаб келмоқда. Дастлаб, “Рубин” клубининг иккинчи жамоасига бориб қўшилган ярим ҳимоячи кейинчалик асосий таркибга ҳам ўтказилган.

Турли йилларда Премьер-лига ва биринчи лигада “Сибирь”, “Уфа”, “Тосно”, “Томбов” каби клублар шарафини ҳимоя қилди.

Галиулин фаолияти давомида “Рубин” сафида 2008 йили Россия чемпионлигига сазовор бўлди. Қозонликлар билан 2010 йили МДҲ чемпионлар кубогида ғолиб чиқди.

2017-2018 йилги мавсумда “Тосно” жамоаси билан Россия кубогида муваффақиятли иштирок этиб, бош соврин соҳибига айланди.

Галиулин универсал футболчи ҳисобланади. У фаолияти давомида ҳар икки қанот ҳимоячиси, ярим ҳимоячиси ва ҳужумчиси, марказий ярим ҳимоячи, ҳужумкор футболчи, ҳужумчи амплуаларида тўп тепган.

Клублар миқёсида жами 409 та учрашувда иштирок этиб, рақиблар дарвозасини 44 маротаба ишғол қилган, жамоадошларига 43 та голли пас узатган.