"Тикланиш учун анча вақт йўқотдим", "Сурхон"да 1-2 та одамларнинг гапига ишониб қолдим" ёхуд оғир жароҳатдан кейин Суҳроб Бердиев нимани кўзлаяпти?

Тажрибали футболчи Суҳроб Бердиев оғир жароҳатдан кейин яна майдонга қайтганини биласиз. Қўқондаги фаолиятидан сўнг у бу йилги мавсумни про лигада “Янгиер” сафида бошлашга қарор қилди. Ҳозирда жамоасининг асосий етакчиси саналади. Sports.uz мухбири эса Бердиевга бир қатор саволлар билан мурожаат қилди.

- Суҳроб, бир қатор жамоаларда тўп сурдингиз. Уларнинг орасида “Қўқон-1912”даги фаолиятингиз қандай аҳамият касб этади?

- Энг яхши таассуротларим Қўқонда десам ҳам бўлади. Унгача “Шўртан”, “Олмалиқ”, “Пахтакор”, “Локомотив” каби клубларда ўйнадим ва у ерлардаги фаолиятим ҳам яхши чиққан. Лекин “Қўқон-1912”да 4-5 йил тўп сурган бўлсам, фақат ажойиб хотиралар сақланиб қолган. Жамоа бир оила эди, ички муҳит ҳам зўр бўлган. Яхлит бир жамоа сифатида шаклланганмиз. Мухлисларига ҳам яхши таъриф бераман.

- Жароҳатгача клубда етакчилардан бири эдингиз. Айтинг-чи, ўша жароҳат сизни руҳий тарафдан “синдирди”ми?

- Тўғри, руҳий томонлама қаттиқ бўлди. Ўйнаб юрган ўйинчини кутилмаганда жиддий жароҳат олиб ётиб қолиши бу энг ёмони экан. Спортчиларни душмани жароҳат, деб бежизга айтишмайди. Ростдан ўша пайтда тушкунликка тушиб қолгандим. Худога шукр, кейин ҳаммаси жойига тушиб кетди. Шунақа бўлиши керак экан-да, ҳаммаси Худодан. Аста-секин жойига қайтяпти. Фақат вақт йўқотдим. Бу футболчилар учун муҳим. Тикланиш жараёнига кўпроқ вақт кетиб қолди. Жароҳатдан кейинги қайта тикланиш бўйича бизда камчиликлар бор-да. Шунинг учун оёққа туриш учун кўпроқ вақт кетиб қолди. Ҳозир анча яхшиман. Фақат вақтни қайтариб бўлмайди. Тикланиш учун анча вақт йўқотилди.

- Тўғри, анча вақт кетди. Шундай бўлса-да, сизни яна Суперлигада кўрамиз, деб ўйлагандик. Кутилмаганда про лигада пайдо бўлдингиз. Ёки Суперлигада рақобатга ҳали тайёр эмасман, деб ўйладингизми?

- Жароҳатдан кейин Суперлигада кўплаб учрашувларда ўйнай олмадим. Балки шунинг учун Суперлигадаги мураббийлар менга ишонч билдиришмагандир ёки жароҳатдан сўнг тўлиқ тузалмади, деб ўйлашгандир. Биринчи бўлиб про лигада мавсумни “Андижон”да бошламоқчи бўлдим. Кейин бир-иккита одамларга ишониб қолиб, “Сурхон”нинг таклифини қабул қилиб, у ерга боргандим. Испаниялик мураббийлар ўзгарди. Мана, ҳозирда про лигадаман. Мақсадим олдинги спорт формамга қайтмоқчиман. Ўтган йили жароҳатдан сўнг ўйин амалиётисиз қолиб кетганим ҳам сабаб бўлди.

- Ёдимизда, қишки йиғин пайтида “Андижон”да шуғулландингиз. Кейин “Сурхон”га бордингиз ва сўнг “Бухоро”га. Якунда “Янгиер”дан қўним топдингиз. Клуб танлашда хатога йўл қўйгандим, деб ўйламаяпсизми?

- Шунақа деса ҳам бўлади. Чунки ҳамма гап ўзимда қолганди. Бир-иккита одамларга ишонгандим, улар ҳам вазиятни тушунтиришганди, балки қарор қабул қилишда ўзим адашгандирман. “Сурхон”га келган испанияликлар билан гаплашиб, уларнинг гапига ишониб қолдим. Ҳаммаси Худодан. Барчаси ўз қарорларим билан бўлди. Ҳаракат қилиб, яна курашаман.

- Айнан нега “Янгиер”?! Ёки охир-оқибат олдингизда бошқа вариант қолмаганлиги учунми ё бошқа сабаби борми?

- Ўша пайтда трансферлар ойнаси адашмасам 26 ёки 27-санада ёпиларди ва бунга 2-3 кун қолганди. Суперлига клублари деярли ўзига керакли футболчиларни олиб бўлганди. Про лигадан яна бир-иккита вариантлар бўлди. Аммо “Янгиер”дан бош мураббий Бекзод ака Қодирқулов ва Илҳом ака Жуманов қўнғироқ қилиб, таклиф қилишди ва гаплашдик. Бу клубда Суперлигада ўйнаган таниш футболчилар ҳам бор эди. Абдуқаҳҳор Ҳожиакбаров, Қаҳрамон Баҳодиров, Сирож Мелиев каби ўйинчилар. Яхши жамоа тузилаётганди. Таркибдаги футболчилар билан бир-биримизни тушунамиз, дея шу вариантни танладим. Жамоага ёрдам бериш ва спорт формамни тиклаш учун ҳам шу қарорга келдим. Тўғри, тўртта учрашувда ютқаздик. Биринчи учрашувни яхши бошлаб олгандик. Ўзимизга ишончимиз бор. Бу ерда ҳали ҳаммаси яхши бўлиб кетади. Про лигадаги ўрнимизга мос эмасмиз. Куч-қувватимиз ва салоҳиятимизни яхши биламиз. Битта учрашувда ютиб олсак, ишларимиз юришиб кетади ва юқори ўринларга ҳаракат қиламиз.

- Ёзги трансфер вақтида Суперлигага қайтмоқчимисиз? “Янгиер” сиз учун вақтинчаликми?

- Режам шунақа ва ҳаракатим ҳам шунга. “Янгиер”ни ўзим учун вақтинчалик, деб айтмаган бўлардим. Барча футболчининг мақсади Суперлигада ўйнаш. Мени ҳам мақсадим шу. Олдинги спорт формамни тиклаб қайтмоқчиман. Тўғри, ўз даражамга ҳали 70-80 фоизга ҳам қайтганим йўқ. Бунга боя айтганимдек, ўтган йили ўйин амалиётисиз қолиб кетганим сабаб.

- Суперлига билан про лига ўртасидаги тафовут каттами ёки қисқардими?

- Суперлига билан про лига ўртасидаги энг катта фарқ стадион ва майдонларда, дейишим мумкин. Суперлигада прожектори яхши бўлмаган стадионларга рухсат берилмаяпти. Майдонлар яхши. Про лигада эса майдон бўйича жиддий фарқ бор. Агар бу ердаги клублар майдонларини яхшиласа, Суперлига билан фарқи янада қисқаради. Ўйин бўйича гапирсам, тўғри, Суперлигада кўпроқ аниқликка эътибор жиддий қаратилади. Про лигада жисмоний кучга ва тезкорликка кўп нарса боғлиқ. Тез қарор қабул қилишингиз керак. Жамоалар сизни ўйлашингизга қараб туришмайди.