"Тўғриси, бундай имконият доим ҳам бўлавермайди" - "Андижон" бош директори Кубок финал олдидан яна нималарни айтди?

“Андижон” клубимиз айни пайтда Ўзбекистон Кубоги финали учун муносиб тайёргарлик кўрмоқда. Барча эътибор тарихий учрашувга қаратилган. 1 октябрдан эса финал ўйини учун чипталар сотуви ҳам бошланади.

Бўлажак муҳим ўйин олдидан “Андижон” жамоаси бош директори Элбек Саматов клуб матбуот хизматига ўз фикрлари билан ўртоқлашди:

“Футбол мухлисларини, Андижон халқини жамоамизни финалгача етиб боргани билан табриклайман. Финалга йўл олганимиз ўзи бир катта байрам. Сабаби, илк бор бу ергача етиб келдик. Ҳал қилувчи учрашувда ҳам ғалаба қозониб, янги тарихни албатта яратишга ҳаракат қиламиз. Тўғриси, бундай имконият доим ҳам бўлавермайди. Шу боис бу имкониятдан албатта унумли фойдаланамиз. Футболчиларга тўлиқ ишонаман. “Навбаҳор”ни чемпионатда ютдик. 4 карра Кубок соҳиби бўлган “Насаф”ни мусобақадан чиқариб юбордик. Бу ўз-ўзидан бўлгани йўқ.

Кубок финали битта ўйиндан иборат ва бунда фаворит йўқ. Жамоаларнинг имконияти тенг. Жамоамизга тўлиқ ишонаман. Бошқа клублардан кам жойимиз йўқ. Ҳозирги пайтда ҳамма футбол ўйнашни яхши билади. Жамоамизнинг кайфияти аъло даражада. Биз финалдамиз ва ҳеч қандай босим йўқ. Ўзимиз ва мухлислар учун ўйнаймиз.

Бундан ташқари, энг яхши мухлислар бизда. Улар 12-ўйинчимиз. Шу боис финалда ғалаба қозонишимизга албатта ишонаман.

Ҳозирги пайтда чипта сотуви бўйича тинимсиз саволлар бўляпти. Бу борада расмий маълумотлар клубимиз матбуот хизмати томонидан бериб бориляпти. 1 октябрдан “Андижон”га ажратилган 11 та сектор учун 6500 та чипталар Андижонда сотилишни бошлайди. “Бобур арена” стадионимизнинг расмий кассаларида сотилади. Шуни алоҳида айтишим керакки, чипталарни умуман клубга дахли йўқ. Барчаси ПФЛ томонидан назорат қилиняпти. Чипталарни ҳам уларнинг мутахассислари келиб бевосита ўзлари сотувда қатнашадилар”, - дейди Саматов.