Том Аспиналл ўйиндан чиқди, энди Сирил Ган ким билан жанг қилади?

Оғир вазн тоифасидаги ММА устаси Сирил Ган навбатдаги жанги олдидан тайёргарликни бошлаб юборди. Бу ҳақда унинг спарринг-шериги — Пуйя Раҳманий хабар бермоқда.

"Сирилга Аспиналлга қарши баҳс учун тайёргарликда ёрдам бергандим. Ўйлайманки, агар ўша тўқнашув иккинчи раундгача давом этганида, Ган Томни финиш қиларди...

Франциялик келаси ҳафта яна Дубайга келади ва навбатдаги жангга мен билан тайёрланади.

Ўйлашимча, реванш бутунлай бошқача бўлади. Мутлақо бошқа сценарийда ўтади, бунга ишонаман. Бу сафар француз англияликни нокаутга учратади", — деди Раҳманий "Bowks Talking Bouts" нашрига берган интервьюсида.

Маълумот учун, Сирил Ганнинг навбатдаги жангга тайёргарликни бошлагани ҳақидаги хабарлар французнинг вақтинчалик чемпионлик камари учун жанг қилиши эҳтимолини янада кучайтирмоқда. Чунки Том Аспиналл ҳозирча октагонга қайтишни режалаштирмаяпти.

Тахминларга кўра, Ганнинг эҳтимолий рақиби ярим оғир вазн тоифасида UFC чемпиони Алекс Перрейра бўлиши мумкин.