“Топ-100” шахматчилар рейтингида Абдусатторов, Синдаров ва Якуббоевнинг ўринлари маълум бўлди

Халқаро шахмат федерацияси (FIDE) “Топ-100” шахматчилар рейтингини янгилади. Декабрь ойига кўра, Магнус Карлсен 2840 очко билан пешқадамлик қилмоқда. Кейинги ўринларни эса Ҳикару Накамура (2810) ва Фабиано Каруана (2795) эгаллаган.

Ҳамюртимиз Нодирбек Абдусатторов 2732 очко билан 17-поғонада бормоқда. Яқинда FIDE Жаҳон кубогида ғолиб чиққан Жавоҳир Синдаровнинг ҳисобида 2726 очко мавжуд ва у рейтингда 22-ўринда турибди. Нодирбек Якуббоев эса 2691 очко билан дунёнинг энг кучли 38-шахматчиси сифатида эътироф этилган.