Тошкент рингларида супержанглар. Асосий қаҳрамонлар – енгилмас Баҳодир Жалолов, Ҳасанбой Дўсматов ва Асадхўжа Мўйдинхўжаев!

Ўзбекистон пойтахти Тошкент шаҳри биринчи маротаба мезбонлик қилган бокс бўйича катталар ўртасидаги жаҳон чемпионати ҳал қилувчи паллага кирди.

Дунёнинг 107 мамлакатидан 538  нафар боксчи қатнашган мусобақада 13 вазн тоифасида финал баҳслари бўлади.

Финалга энг кўп йўлланма олган Ўзбекистон миллий терма жамоаси бўлди. Мусобақада барча вазн тоифаси бўйича қатнашган боксчиларимиздан тўққиз нафари ярим финалга йўлланма олган эди. Улардан икки нафари – Аълохон Абдуллаев ва Лазизбек Муллажонов бронза медаль билан кифояланди.

Қолган етти нафар боксчимиз ярим финал босқичидан муваффақиятли ўтиб, Тошкент рингларида жаҳон чемпионлиги учун курашиш имкониятига эга бўлди.

Финалга йўлланма олиш бўйича иккинчи натижани Қозоғистон терма жамоаси вакиллари қўлга киритди. Қозоқлар ярим финалдан йўқотишсиз ўтди ва уларнинг беш боксчиси энди ҳал қилувчи баҳсда иштирок этади.

Чорак финалгача энг зўр натижа қайд этган Куба терма жамоаси вакиллари ҳал қилувчи босқичда “тўкилиб” кетди. Охир-оқибат улардан тўрт нафар чарм қўлқоп устаси оғирги босқичгача етиб келди.

Россия ва Франция терма жамоалари сўнгги босқичда икки нафардан боксчи билан қатнашади. Грузия, Мўғилистон, Бразилия, Хитой, Озарбайжон ва Италия терма жамоаларидан биттадан чарм қўл қоп устаси финал иштирокчисига айланди.

Халқаро бокс уюшмаси қоидасига кўра, финаллар икки кун давом этади. Биринчи кунги дастурда қуйидаги боксчилар финал учрашувини ўтказади:

- 48 кг: Сахил Алахвердови (Грузия) – Санжар Ташкенбай (Қозоғистон)

- 67 кг: Дулат Бекбауов (Қозоғистон) – Асадхўжа Мўйдинхўжаев (Ўзбекистон)

- 60 кг: Эрисланди Альварес (Куба) – Суфён Умиха (Франция)

- 75 кг: Вандерлей Перейра (Бразилия) – Йоенли Эрнандес Мартинес (Куба)

- 51 кг: Билол Беннама (Франция) – Ҳасанбой Дўсматов (Ўзбекистон)

+92 кг: Арзола Лопес (Куба) – Баҳодир Жалолов (Ўзбекистон)

Финал учрашувлари 13 май куни Тошкент вақти билан 17:00 дан бошланади.

Жаҳон чемпионлиги учун рингга чиқадиган боксчиларимизни қўллаб-қувватлаб, уларга омад ва муваффақият тилаймиз!

Финал учрашувларидан энг қайноқ хабарлар ва суратларни sports.uz сайти ва сайтимиз ижтимоий тармоқлари орқали эътиборингизга ҳавола этамиз!

Қолган вазн тоифалари бўйича финал учрашувлари 14 май куни бўлиб ўтади. 

13 май куни финал: Боксчиларимиз кимларга қарши жанг қилади?

Баҳодир Жалоловга Америкадан мурожаат келди!