"УЕФА президентининг қўлидан ҳеч нарса келмайди" ёхуд Ўзбекистон чемпионатида ишлаб кетган мутахассис энди Испания клубида!

Гапни нимадан бошлаш керак? Яқинда чемпионатимиздан кетиб Испанияда иш бошлаган мутахассисданми ёки Европа футболининг иккига бўлинаётганиданми? Бугунги мақоламиз эса бевосита иккаласини бир-бирига уйғунлаштиради.

Қишда “Машъал” клубида иш бошлаган, кейинчалик бош мураббийга айланган, аммо у ерда узоқ қолмаган испаниялик Серхио Маринангели ҳақида гап боради. У Испанияга қайтиб кетганидан кейин узоқ вақт ишсиз қолгани йўқ. Қолганини ўзидан эшитинг:

- Ҳозирги пайтда Испания учинчи дивизиони иштирокчиси бўлган “Расинг Мурсия” клубида ишламоқдаман. Бу клуб катта эҳтимол билан Сегундага йўлланма оладиган жамоа ҳисобланади. Клубга яхши сармоя киритилади, аммо натижалар кутилганидек эмас. Мен бир дўстим билан бирга ушбу клубдаги салбий натижаларни йўқотиш устида иш олиб боряпмиз. Айни пайтда илк натижаларга ҳам эриша бошладик. Шуни ҳам таъкидлаб ўтишим керакки, бизнинг таркибимизда собиқ “Реал” футболчиси Ройстон Дренте ҳам бор, - деди Серхио sports.uz мухбирига.

Маринангели билан мулоқотимиз давомида ундан “Машъал” ҳақида ҳам сўрадик. Гарчи у ердаги фаолияти қисқа давом этган бўлса ҳам испаниялик мутахассисда яхши хотираларни қолдирди. Шу сабабли Серхио собиқ клубининг натижаларини кузатиб бораётганини маълум қилди.

- “Машъал”га жуда яқинман. Футболчилар билан тез-тез суҳбатлашиб тураман ва натижалари ҳақида қайғураман. Мен уларнинг салоҳиятига ишонаман ҳамда келгусида яхшироқ натижалар қайд эта олишларига умид билдираман. Улар мен бермоқчи бўлган нарсаларимни тушуниб улгурган, назаримда.

Биз Европа футболида, аниқроғи УЕФАдан ажралиб чиққан 12 та етакчи клубнинг алоҳида Европа Суперлигаси ташкил этиши борасида мутахассис фикри билан қизиқмоқчи эдик. Бу масала бўйича Маринангели биз учун айни муддао эди. Шунинг учун фурсатдан фойдаланиб, ундан юқоридаги мавзу бўйича ўз муносабатини билдиришини сўрадик.

- Менинг фикримча, футбол - бу жуда катта пул айланадиган бизнес тури ва кўп йиллардан бери УЕФА уни ўз монополиясига айлантириб олганди. Ҳар бир клуб ўз тақдирини ўзи ҳал қилиш ҳуқуқига эга. Келажакда қай бир йўл тўғрилигини вақт кўрсатиб бераверади.

Шунингдек, бундай ғоянинг ташаббускори сифатида “Реал” ва унинг президентини кўрсатиш мумкин. Хўш, янги Европа Суперлигасига асос солиниши Испанияда қандай қабул қилиняпти?

- Испаниядаги жуда кўп футбол федерациялари бу фикрни маъқулламоқда. Пандемия даврида футбол клубларидаги молиявий муаммолар ҳавас қиларли даражада эмас. Клубларнинг баъзи қисми бу ғояга қарши ҳам чиқмоқда. Жуда кўп клублар ўз чиқимларини қоплай олмай қолди, уларни тушуниш мумкин, - деди “Машъал”нинг собиқ устози.

Энди Европа Чемпионлар лигасининг мавқеи қандай бўлади? 12 та гигант клубнинг алоҳида ажралиб чиқиши чемпионлар лигасининг нуфузини жиддий равишда тушириб юборадими? Бу борада Серхио шундай деди:

- Чемпионлар лигаси даражасидаги яна бир мусобақа унга рақобат уюштириши, уни қўрқитмаслиги керак, деб ҳисоблайман. Менимча, Чемпионлар лигаси доим ўз ўрнида қолади. Барча уни ютишни хоҳлайди.

Бундан ташқари, УЕФА президенти ҳам ОАВ орқали кескин баёнотлар билан чиқиш қилмоқда. Ёки унинг қўлидан энди ҳеч нарса келмайдими?

- УЕФА президенти ўз бизнеси ҳақида қайғуряпти ва ўз чемпионатини таваккал қилгиси келмаяпти. Менимча, унинг қўлидан ҳеч нарса келмайди, - деди биз билан мулоқотда Серхио Мариненгели.