УЕФА яна бир мусобақани бекор қилганини эълон қилди

Коронавирус пандемияси ва мамлакатлар ўртасидаги саёҳатга чекловлар УЕФА Ёшлар лигасида мавсумни бекор қилишга олиб келди. Ушбу қарор УЕФА Ижроия қўмитаси томонидан қабул қилинган.

Дастлаб, Ёшлар лигасида мавсум бошланиши баҳорга қолдирилгани, мусобақа формати ўзгартирилиб, унда фақатгина плей-офф ўйинлари ўтказилиши маълум қилинган эди.

“Иштирок этувчи клубларнинг ҳаракати чекланиши ва уларнинг учрашувларини ташкил қилишда жиддий қийинчиликлар келтириб чиқармоқда. Аллақачон иккита клуб мусобақада иштирок этишдан бош тортди. УЕФА Ижроия қўмитаси мусобақа бошланишини яна кейинга қолдиришнинг иложи йўқлигини ва ёш футболчиларнинг саломатлиги ва хавфсизлиги устувор вазифа бўлиши кераклигини таъкидламоқда”, - дейилади ташкилот баёнотида.