Уни Қозоғистонда кутишганди ёхуд муаммоси ҳал этилган легионер

“Сурхон”нинг бу йилги таркиби ўтган йилгисидан деярли буткул фарқ қилади. Чунки кўплаб етакчи футболчилар жамоани тарк этди. Шунга яраша, клубнинг ишлаш йўналиши ҳам ўзгарди. Энди олдинги йиллардагидек тажрибали футболчилар эмас, балки кўпроқ истеъдодли ёшларга эътибор қаратилиши устивор вазифалардан бири сифатида белгиланди.

Барибир жамоани тўлиқ ёшларга ишониб топшириб қўйиш ҳам ўзини у қадар оқламасди. Чунки уларнинг ёнига тажрибали ўйинчилар зарур. Буни яхши тушуниб турган клуб мураббийлари ўтган йилги айрим етакчиларини сақлаб қолишга эришдилар. Булардан бири 32 ёшли сербиялик легионер Владимир Бубанья.

Лекин ушбу футболчи билан клуб ўртасида юз берган ҳолатдан ҳамма хабардор бўлса керак. Ўтган йилги мавсумни “Сурхон”да бошлагач, кейинчалик кетиб қолганди. Сўнгра, қарздорлик билан боғлиқ муаммо туфайли легионер ФИФАга арз қилди. Натижада халқаро футбол ташкилоти Бубаньядан бўлган қарздорлик тўламагунча “Сурхон”га янги ўйинчиларни трансфер қилиш тақиқини қўйганди.

Ўз навбатида, “Сурхон” бу ишга жиддий қараган ҳолда Бубанья билан боғлиқ муаммони бартараф эта олди. Натижада, ФИФА термизликларга қўйилган тақиқни бекор қилди. Шундан сўнг, “Сурхон” Бубаньяга яна бирга ҳамкорлик қилиш бўйича таклиф билан чиқди. Сербиялик ҳимоячи эса ўйлаб-ўйлаб, яна “Сурхон” шарафини ҳимоя қилишга рози бўлди. Ҳаммаси ҳал бўлгач, Бубанья sports.uz мухбирининг саволларига қисқа ва лўнда жавоб қайтарди.  

- Владимир, ниҳоят, сиз билан боғлиқ “Сурхон” ва ФИФА ўртасидаги вазият якунланди. Аслида ҳаммаси қандай юз берганди ва қай тариқа якунланди?

- Ҳа, охир-оқибат муаммо ҳал бўлди. Мавжуд қарзлар тўланди ва биз биргаликда қадам ташлашда давом этамиз.

- Сир бўлмаса, клуб сизга қанча миқдорда пул тўлади?

- Айтишим керакки, қарз тўлалигича тўланди. Аммо бунинг суммаси қанчани ташкил этишини айтишни истамайман.

- Клуб билан ўртангиздаги келишмовчилик туфайли сизни “Сурхон”га қайтмайди, деб ўйлагандик. Қайтишингизга нима сабаб бўлди?

- Ўртамиздаги ўзаро мулоқот чоғида ҳал қилувчи омил сифатида бир-биримизни тўғри тушунганимиз муҳим аҳамият касб этганини айтишим даркор.

- “Сурхон” билан ўртада яна можаро юз бермаслигига ишончингиз комилми?

- Ўртамизда ҳеч қанақа тушунмовчилик ва можаро юзага келмайди. Энди иккала томон учун ҳам ФИФАга арз қилишга ҳожат қолмади.

- “Сурхон”дан кўпчилик футболчилар кетди. Сизнингча, таркиб кучсизланганми, клуб қайси ўрин учун курашади, деб ўйлайсиз?

- Таркибимиз анча кучсизланиб қолди. Кўплаб яхши ижрочилар клубни тарк этди. Шу боис, бошланажак янги мавсумда бизга осон бўлмаслиги тайин.

- Олдингизда қайси клублардан аниқ таклифлар бор эди?

- Айтишим жоизки, хизматимга Қозоғистондан иккита клуб қизиқиш билдирди.

Матнда хатолик топсангиз, ўша хатони белгилаб, бизга жўнатинг (Ctrl + Enter)