Вальверденинг "Реал"даги келажаги сўроқ остида қолмоқда

Федерико Вальверденинг Мадриднинг "Реал" клубидаги келажаги Орельен Тчуамени билан юзага келган можародан кейин муҳокамалар марказига айланди.

AS маълумотига кўра, уругвайлик ярим ҳимоячи атрофидаги вазиятни Европанинг бир қатор топ-клублари диққат билан кузатмоқда.

Манбанинг таъкидлашича, футболчининг ўзи клубни тарк этиш вариантини кўриб чиқмаяпти ва сўнгги можарога қарамай, фаолиятини "Реал"да давом эттирмоқчи. Ҳозирда у жароҳатидан тикланиш жараёнини ўтамоқда.

Вальвердега "Манчестер Юнайтед" ва ПСЖдан ташқари "Манчестер Сити" ҳам қизиқиш билдирмоқда. "Шаҳарликлар" ўтган ёзда ҳам "Реал" билан алоқага чиққан, аммо ўшанда трансфер амалга ошиши қийин деб баҳоланган эди.

Энди Манчестер клуби уругвайлик футболчини трансфер қилиш вариантини яна кўриб чиқишга тайёр. Эҳтимолий трансфер суммаси 100–120 миллион евро атрофида баҳоланмоқда.

Жорий мавсумда Вальверде барча турнирларда 48 та ўйинда қатнашиб, 9 та гол ва 13 та голли узатмани амалга оширди.